أخيييه يادنيا , سمستر الهم برقر

من مبدأ اللحسان هذي إحدى التدوينات والتي سوف تدخلها عزيزي القارئ وتطلع منها وإنتا مافهمتش حاقة واللهي.
عدة مواضيع ولا لها ترتيب معين ويمكن أصلاً أنسى بعضها وما اتكلم عنه إذا إستنزفت كامل قواي وإلهاماتي المعنوية وانا استرسل في الكتابة عن إحدى النقاط

أتحدددددددددى إبن أمممممممممه يكتب زي السطر اللي طاف هذا.

المشاكل مشاكل , إن جيتها من يمين ولا من يسار , ومشكلة المشكلة إنك لازم تحلها طبعاً .. ويختلف حجم المشكلة من شخص لشخص , الشخص اللي راعي مشاكل ومتعود دايماً هذا بيعرف كيف يصرف لها حل بأرخص شي عنده.

برضه الإنسان الذكي هو اللي يعرف يدبر نفسه حتى لو المشكلة جديدة عليه.

أنا طبعاً إنسان ذكي

لكن شسالفة بالضبط , لاتحاول تفهم.

غلطت غلطة جوهرية الترم هذا وسويت نفسي دافور ونزلت 18 ساعة. طبعاً ممكن بعضكم يقول 18 ساعة شوي ومدري إيش ,, ترا تختلف الساعات من جامعة لجامعة ,, اللي اعرفه إنه بجامعتنا أعلى شي ممكن ينزله الواحد هو 18 ساعة ولو صار دافور وبواسطة ممكن ينزل 20 ساعة.

في بداية الترم كان التخطيط إني أنزل 18 ساعة وبعدين أحذف 3 أو 6 ساعات , اللي مايعجبوني اشيلهم.
بدا الترم بأول مادة , دخلت الكلاس , ثلاث أرباع الموجودين أخوياي الفلة لوووول ,, قلت أوكي , هذا برا القائمة , ماراح احذف هالمادة.

المادة اللي بعدها , طلع نصهم موجود وأساساً الكلاس كله 11 طالب 5 منهم أعرفهم فلة وكويسين و الباقين ماعرفهم لكن تعرفت على ثنين منهم زيادة.
ف برضه هالكلاس مستحيل أشيله لووول

اللي بعدها دخلت الكلاس مافيه إلا أنا
بدت المحاظرة دخل اثنين طلاب
على آخر المحاظرة جا واحد فتح الباب فجأة وهو يلهث وحالته حالة (نصاب طبعاً) يقول ماكنت أدري وين محل المحاظرة ومعليش دكتور انا اسف جاي اركض ومن هالكلام والهلس الزايد.

ف هذا الكلاس حقيقتن كسر خاطري فيه الدكتور ماحد عطاه وجه ونزل عنده غير 4 طلاب , ف قلت حرام احذفه مايقعد عنده إلا 3 طلاب . 2 يقطعون بصل وواحد ينتبه للرز بالقدر والدكتور يبهر الدجاج مايصلح. لازم واحد يجهز السفرة.

مبين إن شكلي مطول بقعد اشرح لكم عن كل مادة ؟؟ لووول

المهم والزبدة والمراد ومن الآخر كذا على بلاطة يعني بدون مقدمات ولا مؤخرات الله يكافينا ويكافيكم شر الأخيرة ويعطينا ويعطيكم خيرها مع إني ماتوقع يجي منها خير ,من برا هالله الله ومن جوا يعلم الله على ماقالوا , المهم إنه كل كلاس له ظروف معينة خلتني ما أحذفه
معناها 18 ساعة يا موصاحي لين آخر الترم إن شاء الله لووووول

تخيلوا عاد معاي , 6 مواد , كل مادة لها 4 إختبارات عامة Majors و مالايقل عن 4 إختبارات صغيرونة Quizzes غير إنه كل مادة لها مشروعين أو مشروع عالأقل بالإضافة إلى الواجبات والكلام الفاضي اللي يصير دايماً بكل مادة.
طبعاً كل دكتور أو مدرس يعتقد إنه هو الوحيد بالجامعة وإن مافيه مادة غير مادته وإن الطلاب أصلاً ماعندهم غير مادته ف يكرف أبوك بالواجبات والتحضير والمشاريع والإختبارات الحريقة.
تعال ياموصاحي جمعها عاد.

يوم يجيك خويك يدق عليك:

  • الووو شلونك موصاحي ؟ وش سويت عالمذاكرة ؟
  • أي مذاكرة ,,
  • الإختبار الليلة الساعة 8 أما ماتدري ؟
  • لا والله العظيم ما ادري ,
  • امس الدكتور ارسل لنا رسالة عالإيميل وقال الإختبار الليلة
  • ,, يوووووووووووووه طيب أنا قاعد احل واجب حق واحد شرير ثاني ,, وش الدبرة ؟
  • مدري عنك دبر روحك , باي (زحلق نفسه الخوي العفن)

واقعد ياموصاحي ذاكر للإختبار وبعد ماتروح للإختبار وتاكل (طوووط) وترجع ابدا حل الواجب لين الصباح.

وإذا جات الساعة 6 الصباح وانت تقول اواصل ما أواصل أواصل ما أواصل
تبدا تراودك نفسك اللوامة على إنك تاخذ لك غفوة صغيييييييرة بس ساعة كذا قبل الدوام .

الللللللللللللللللللللللله ياخذ اللي إخترع زر غفوة في الجوال قسم بالله إنه حمار

يعني واحد يبي يصحى, وشوله ياخذ غفوة ؟
أنا أشك إنه نفس السوداني اللي سألوه , إيش تسوي أول ماتصحى من النوم ؟ قال آخذ لي غسطاً من الراحة لووووول.

المهم ,, غفوة غفوة غفوة لين تروح عليك المحاظرة الأولى واللي المفروض انك تسلم الواجب فيها ..

مشاويييييير ياقلب العناااا مشاااوير.

بالله للحين قاعدين تقرون ؟ يعني حاط تدوينتين مدري ثلاث قبل هذي , للحين ماكتشفتوا إن ماعندي سالفة ؟


خلص من الجامعة وهمها وغمها يبقى عندك مصيبة ألعن منها وهي الشركة الإلكترونية اللي فاتحها وعملاااء ومشااااكل ووجع رااااس ممكن تقعد مشغول فيه من الصباح للفجر بالراحة.

طبعاً هذي نصيحة عن تجربة للي بالجامعة أو بغيرها

لاحد يتفلسف ويسوي بطل وينزل 18 ساعة.
رحم الله امرئ عرف قدر نفسه وياشين السرج اللي يكذب الغطاس.

نصيحة أخرى
لاتولع زقارة بالمقلوب , قسم بالله طعمها وصخ.

<<<مبين إنه توه متوهق فيها ودخل السالفة بالموضوع؟

على طاري المشاكل ومشكلة المشكلة اللي سويتها لكم ببداية التدوينة

تدرون إن الواحد لما يجيه مشكلة
ومايتخذ فيها قرار
يكون إتخذ قرار ؟

لاحد يسألني كيف ,, الفيلسوف بيفهمها اللي مافهمها يطق راسه بالجدار
الزبدة إنك حتى وإنت ماتسوي شي , إنت قاعد تسوي شي , ألا وهو إنك ماتسوي شي.
نتيجة لهذا التحليل طلعت بهذا السطر.
الإنسان اللي يقول أنا فاضي وطفشان هذا إنسان كذاب ويشتاهل السنق من رجوله لين يتأدب.

مافيه شجرة إلا وهزها الريح ياصاحبي وكلن على همه سرى.

ماقلت لكم إني بنسى نص المواضيع اللي بكتب عنها ؟
قسم بالله كان عندي اهداف من هالتدوينة بس مدري وين راحت ..

يالله مانبي نتعبكم إذا تذكرت شي بحطه لكم.

تشاوات

موصاحي

3 comments

  1. tota · مايو 9, 2009

    ^^ مآشالله حلوو اجل تمآآم ..
    عالقوه موصاحي كمل دفارتك 😀

    “بعدها ترم خفيف يمكن حتى ما اخذه من خفته < << شوفي الخبل" ههههههههههههه

  2. Mo9a7i · مايو 9, 2009

    خخخخخخخخخخ توبة
    خلاص ان شاء الله مابقالي إلا ترمين خفيفين حلوين
    الجاي منهم دوامي احد وثلاثاء فقط

    بعدها فترة تطبيق
    بعدها ترم خفيف يمكن حتى ما اخذه من خفته <<< شوفي الخبل هههههههه المهم إنها هانت الحمدلله وترم الصيف خلص بدرجات حلوة 😉

  3. tota · مايو 9, 2009

    من موضوع لموضوع ..
    ماشالله عندك شركه + درراسه الجامعه
    الله يقويك عالخير ..
    ولا تتفلسف مره ثانيه وتسوي قوي :d
    وتاخذ 18 ساعه .. الدفاره الواجده مب زينه 😛