التأخير وإحترام المواعيد: ياخي ليش ياخي ؟

ممكن اقول لك شي شخصي استاذة نسرين؟

مابي اقول طول حياتي , لكن لي فترة تقريباً, قاعد احاول احث الناس على الإلتزام بالمواعيد:
جربت طرق عديدة:
إني أخلص الشغل اللي علي أنا شخصياً قبل الموعد بحيث إن الناس اللي حولي يصيرون مثلي, وأكيد التجربة مانفعت وكانت أكبر من فاشلة

  1. جربت إني أعاقب اللي يتأخر , وطبعاً لما تعاقب شخص على شغلة وحدة سواها , راح تحرم نفسك من المنافع الثانية اللي عند هالشخص, ممكن شخص يتأخر لكن كل أموره الباقية تمام التمام , فلما تعاقبه عالتأخير , إعتبر نفسك out of the game مع هالشخص.
  2. وجربت أيضاً إني أقدّر ظروف اللي يتأخر وانتظره يقول لي اسبابه علشان أقتنع فيها, لكن الناس ياخي كذاااااااابييييييييييييييين , الواحد لما يكون مقتنع إنه ماراح يموت لما يكذب , راح يكذب.
  3. وجربت أيضاً إني أقول للشخص قبل لا يعطيني موعد , اضرب المدة في 2 , أو في 3 إحتياط لكن لا تعطيني موعد وتتعداه,, وطبعاً تجربة فاشلة , لان الشخص اللي بيتأخر بيتأخر ,, لو تقول له ابيك تكتب لي كلمة بسم الله الرحمن الرحيم على ورقة وابيك تسلمها لي بعد اسبوع,, بيمر الأسبوع وهو ماكتبها وبعدين بيجيك يقول لالالا ماعليك الحين الحين اكتبها ماتاخذ ثواني, طيب يابن الستين في سبعين ليش ماسويتها بأول الثواني وعطيتنياها ووفرت علي وقت؟
  4. وجربت أيضاً إني أستحمل واصبر, لكن وين الصبر ؟
  5. وجربت برضه إني أكون إنسان لحوح علشان الواحد يخلص شغله بالموعد المحدد (طبعاً بدون كره ولكن علشان أخلي الشخص مايتأخر), وفشلت هالتجربة لاني صراحة كرهت نفسي وحسيت إني زلع والناس ماتتجاوب. قاعدة تشوفني بكل وضوح إني زلع وخلاص انا صرت zla3-list عندهم وبينفرون مني بالمستقبل.

كل هالتجارب عشان اعرف اسباب التأخير
لاني أعرف الناس مستحيل يعترفون بسبب التأخير الفعلي, مهما كانوا مطاوعة أو غير مطاوعة, كبار أو صغار, دايماً السبب اللي نسمعه منهم سبب غير مقنع
فيه ناس مننا بعد مايسمعون هالأعذار (بشكل عام أعذار تأخير أو أعذار شي ثاني)
يبلعونها ويسكتون علشان يستمر العالم وماتوقف الدنيا
وفيه بعضهم ينشب لك بحلقك لين تعترف أو تتهاوش معاه وانت قاعد تحاول تدافع عن نفسك.

على طاري البلعة والسكوت عن الكذب, إنتظروني في تدوينه ثانية عن سالفة أسرار الناس, ودك تعرف أسرار الناس ولا ودك الأسرار تبقى أسرار ؟

عالعموم , في إطار هذي التدوينة الخايسة واللي في الحقيقة كنت برسلها لشخص كان متأخر علي وبعدين تعوذت من بليس وقلت لا تلعب بعقول الناس وخل الدنيا طبيعية. لانك متى ماحاولت تغير شي بالامور الطبيعية , ممكن يصير شي زين معاه ستمية شغلة خايسة أو ممكن ينقلب كله خياس بخياس
المهم, في إطار هذي التدوينة

أعترف الآن , كل هالطرق اللي جربتها فشلت.
ماراح اوقف عن السؤال عن الأسباب ومحاولة تغييرها
لكن بحاول اجرب مع نفسي وبيني وبين نفسي أول لين اشوف وش سالفة هالدنيا اللي ماعندها سالفة.

تحياتي وأرجع واقول لكم ياللي قاعدين تقرون هالحروف
كلكم ماعندكم سالفة واللي يسمع للملحوس يعتبر ملحوس آخر

تحياتي

موصاحي

2 comments

  1. Mo9a7i · سبتمبر 5, 2009

    لوووول إقزاكتلي أستاذة توتا
    زلع معناها حاجة تجي بالحلق كذا تخلي الواحد لا يقدر يطرش ولا يقدر يتكلم
    مثل العبرة بس بدون حزن
    وإنشبي وين ماتبين تنشبين بس لا تنشبين بالحلق :p

  2. tota · سبتمبر 5, 2009

    😐 يعني انا ملحوسه
    طيب وش معنى زلع ؟ يعني نشبه او راعي حنه ؟
    ^ تركت الموضوع كله ووقفت عند كلمه