بعض الأسرار, مفروض تبقى أسرار وخلاص

تحذير: هذي المقالة طويلة وتحتوي على بعض الألفاظ الغير لائقة والمخلة بالآداب العامة وتحتوي أيضاً على الكثير من العبارات والأفكار الشريرة والتي قد تتسبب للإنسان ببعض المشاكل العقلية أوالعاطفية إن لم يتم قراءة المقالة بالكامل,
لذا, إن كنت من الناس اللي يطفشون من السوالف بسرعة, أو اللي فيهم لحسة أو إلتفاف مخي وعندك ميول إرهابية, الرجاء إنك ماتكمل القراءة, وأنا من هالمنبر أحيي كل شخص يقراها كاملة ويعطيني أي تعليق حتى لو يقول لي كل تبن وليتهم رقدوا.

الغريزة البشرية, أو مايسمى بالنفس الشريرة أو النفس اللوامة, تعتبر الشيطان الثاني في حالة غياب الشيطان, أو نقدر نقول بأنها الشيطان الأول حيث أنها موجودة حتى بغياب الشيطان.

حتى الشيطان نفسه, إحنا مؤمنيين بأنه كان من كثرة طيبته وحبه لله سمي بالسجاد, ولكن , ممكن تكون عنده نفس شريرة سيطرت عليه في الموقف اللي أمره فيه الله بأن يسجد لآدم عليه السلام ورفض من باب الغرور وهذي إحدى صفات النفس الشريرة وإستولت عليه نفسه الشريرة وصار شر مطلق.

على كل حال,

خلونا نطالع بأنفسنا الآن ووين هي هذي النفس الشريرة فينا؟

الآن راح اتكلم عن كل شخص طبيعي عايش ويتنفس من خشمه مثلي, حتى اللي يتنفسون من فمهم ومايقدرون من خشومهم او أحد فتحات الخشم فيه مشكلة , ماهو موضوعنا, موضوعنا هو:
وشهي الأشياء اللي إحنا نحب نسويها؟
حتى لو كنا نمثل بإننا مانحبها أو إحنا مجبرين إننا مانظهر إننا نحب هالشغلات لدرجة إننا أحيانا مانذكرها ولا نجيب طاريها؟

مخالفة القوانين: أتحدى لو أحد فيكم ماقد فكر بيوم من الأيام إنه يفكر قانون أو يخالف الناس في شي معين!
الكذب: يعني حتى لو بسامحك ياللي قاعد تقرا الحين واقول إنك ماقد كذبت بحياتك, بس أنا متأكد مليون بالمية إنه جاك أكثر من موقف كان ودك تكذب فيه,لعدة أسباب, ممكن عشان تفتك من مصيبة أو ممكن عشان تفك غيرك من مصبة , أو يمكن حتى علشان تتسلى بس وتشوف وش بيصير.

كل إنسان بالعالم فيه جانب سيء مايحب أحد يطلع عليه أو يعرفه

وأيضاً كل إنسان بالعالم فيه جانب طيب وممتاز وممكن أيضاً ماحد يدري عنه أو يعرفه

خلونا على هالمثالين ونبدا نتكلم عن الأفكار والخيالات الشريرة اللي تطري على الواحد أحيانا:
كم واحد فيكم فكر بهالشي, “وشلون بيكون شعوري لو قتلت أحد؟”ـ لوووول, أدري بتقولون مريض, لكن مريض لسبب واحد هو إني قاعد اكتب هالكلام لكم , لو إني ساكت ومخلي الفكرة هذي بيني وبين نفسي ماكان قلتوا عني شي, لكن الحين انا ماني قاعد اتكلم عن نفسي , أتكلم عن الناس كلهم, كثير أكيد طرت عليهم هالفكرة.
وهالحوار يدور بين الشخص وبين نفسه, مممم ودي أذبح واحد,,, يلعن ام الهبالة وش قاعد افكر فيه انا ؟ اعوذ بالله من ابليس بس خلني اقصر الشر واشيل هالأفكار من راسي,,,,طيب؟ وشلون لو إني ذبحت واحد شرير وماعنده عيال او احد يسأل عنه, يعني يستاهل إنه ينذبح,,,,, لااااحووول رجعنا لهالفكرة الخايسة,,,,بس انا قاعد اسأل وش بيكون شعوري لو سويتها, مو يعني إني بسويها,,,,لاااحوول انا لسا قاعد افكر بهالشي؟ ذالفكرة شكلها بتشق مخي لين اسويها (أها, هالفكرة هي اللي بتشق مخك؟ ولا نفسك الشريرة قاعدة تسولف معاك وتسوي معاك حوار رومنسي عن القتل؟
أوكي , خلونا نقفل هالحوار المريض مع أنفسنا وخلونا نتجاهل الفكرة وننساها ونسوي أي شي غبي ثاني ينسينا, أو خلونا ننام أصرف

كثير أوقات تمر, نجري فيها حوارات مع أنفسنا زي كذا.
أفكار بايخة , أفكار خايسة وملعونة جدف.
وأحيانا مش أفكار , أحيانا نسوي بعض هالشغلات (ما أقصد القتل)ـ بس اقصد الشغلات المحرمة والممنوعة مثل الكذب والخيانة والنفاق والغيبة, نسويها ولا نقول لأحد عنها, نخليها أسرار بيننا وبين أنفسنا وتستمر الحياة ويازيننا ويامحلانا , الظاهر مننا هوالشغلات الحلوة  الأسرار مفروض تبقى أسرار على طول.

بعترف لكم عن عيب فيني إني أحيانا أفكر بالإنقليزي بيني وبين نفسي, ياليت الإنقليزي مضبوط مية المية , إلا إنقليزي منتف بس مادري, حاجة ماقدرت افتك منها, المهم , بخصوص الكلمتين اللي توني قلتها بالسطر اللي فوق, طرى على بالي مقولة , مادري أحد قالها ولا أنا متفلسف وكاتبها بالإنقليزي, تقول:

We only see two things of people:
1- What we want to see.
2- What they want to show us.
Never the true naked clear picture

نحن نرى شيئين فقط من الناس:
1-الأشياء التي نريد أن نراها.
2-الأشياء التي يريدوننا أن نراها.
لانرى الصورة الحقيقية الصافية أبداً.

المهم, على طاري إننا نخلي بعض الأشياء اللي نسويها ومحنا فخورين فيها  أسرار والمفروض تبقى أسرار

هنا يجي موضوعي اللي ابي اتكلم عنه ” بعض الأسرار يجب أن تبقى أسرار” وأتمنى إن كلامي يكون له تأثير على الرغم من إنه خرابيط موصاحي.

السؤال, ليش ياخي إسمها أسرار ؟ يعني حتى نفسنا الشريرة اللي تحثنا على هالشغلات والخراابيط , تقول لنا إن هالشي لازم يبقى سر, لا تعلم أحد عنه, ياخي تراك بتنفضح وبتصير لك مصايب والناس بيقولون ويسوون فيك, إسمها سر, حتى الشيطان أحيانا يستحي من بعض الأسرار اللي يسويها.

لأغراض موضوعي هنا, راح أقسم الأسرار لقسمين:
1- الأسرار اللي إحنا “البشر الأغبياء” نعتقد بأنه لازم نتكلم عنها, يوووه هذا سر بسيط بس بيذبحني لو ماقول لاحد عادي خلني اعلم الناس اللي حولي وارتاح, والأسرار اللي أحيانا نزلق في الكلام ونقولها بدون قصد ونجيب أم العيد

الغباء اللي يخلينا نقول هذي الأسرار للناس علشان نرتاح منها, إذا إحنا أنفسنا ماقدرنا نمسك سرنا ونسكت وننطم, كيف نثق بشخص آخر حتى لو كان أعز صديق لنا, يعتبر بمنظورنا دايم إننا إحنا احسن منه, ف كيف تقول لشخص أقل منك سرك وتبيه يحفظه لك؟
كيف تقول له سرك وتقول أمانة لا تعلم أحد؟ مستحيل, إلا إذا كان أطرم وأصمخ ومايشوف إشارات يدك ولا يعرف لغة الإشارة, لحظتها ممكن مايقدر يعلم أحد عن اسرارك.

2- النوع الثاني, هو الأسرار اللي إحنا “اللي بعيون أخويانا إحنا أنقص منهم” ودنا إننا نعرفها عن أخويانا أو أقاربنا أو حتى الناس اللي مانعرفهم

هذا هو النوع اللي يعقد من جد ويخلي الواحد يحتقر نفسه أحياناً وينفك مخه وهو يفكر ويحاول يحل المشكلة اللي إكتشفها عن طريق كشف هالأسرار.

الناس يقضون كثييييير أوقات وهم يحاولون ينبشون عن أسرار الناس اللي حولهم,,وأحيانا يتبعون طرق غريبة علشان يكتشفون هالأسرار, أولها الغباء,, تكفى أمانة علمني , قل لي قل لي وش صار, والله ماعلم احد, أو بالحيلة, يمثلون إنهم يعرفون السر لين تجيب العيد وتعلمهم التفاصيل , أو يسرقون هالسر,,يناقزون من عند جدار البيت ويطالعون بالدرايش, يستخدمون تلسكوبات أو أخوياهم بشركات الإتصالات أو بالإختراق أو بغيره.

هذي غريزة بالإنسان ,  مايحب الأسرار حتى لو هي أسراره الشخصية , بس ماحد يركز بنفسه , كلن وده يعرف أسرار غيره, وأحيانا برضه ماوده ينبش بأسرار  أهله , أمه أبوه , إخوانه , جيرانه, لسبب غامض ودفين مايفكر فيه الشخص , واللي هو إنه مايبي ينبش ويحصل شي مايسره في أبوه ولا امه ولا الناس القريبين منه مرة ويكرههم على طول ويكره عيشته معهم وتصير حياته صعبة.

طبعاً ماحد يحب يفكر ليش أنا ما أنبش بأسرار أبوي, والسبب زي ماذكرت قبل شوي , لكن قليل اللي يعرفون هالسبب ,بالعادة الناس تتجاهل هالموضوع وخلاص, لا عاد نفكر فيه بس
ويقعد ينبش بأسرار أخوياه أو الناس اللي حولهم

وشرايك لو إكتشفت إن ابوك يكرهك أو يكره أمك أو إنه قد ذبح واحد يوم إنه صغير ولا علم احد وإنحاش للديرة اللي انتم فيها الآن وغير إسمه
وبدا تاريخ جديد, تخيل إن أبوك في لحظة من لحظات حياته وهو قاعد يعاني من هالسر ويحاول يكتمه , لكن غصب عنه إضطر يطلعه من نفسه ويكتبه على جدار في الربع الخالي
ماحد حوله بس عشان يرتاح شوي, يكتب “تراني قتلت فلان, أو أكره عيالي وماطيقهم ولا اطيق امهم” لوووول, المهم وانت طالع رحلة مع اخوياك بعد سنييييييييين للربع الخالي طحتوا على هالجدار اللي مرتز في نص البر وقريت الكلام وعرفت خط أبوك, يمكن حتى مو خط أبوك وأبوك ماكتب هالكلام, شخص ثاني كاتب هالشي عن نفسه بس إنت طرت ببالك فكرة
إنه, يمكن ابوي مسوي مصيبة مثل هذي وساكت؟

تخيل هالشي صدق, وإنت إكتشفته! , حياتك بتبقى زي ماهي؟

لاعاد, لحظة خلوني أعطيكم المصيبة عاد, تخيل لو إنك إكتشفت إن أمك وأبوك ماهم أمك وأبوك, متبنينك أو لاطشينك وأنت عايش معهم من يوم إنك صغير ولاقالوا لك ولا جابوا لك طاري (هذي فكرة دايم تطري:p)

ماراح ينفك مخك؟ مين أمي وابوي الأصليين؟ مين أهلي وجماعتي؟ وش بتكون علاقتي بهالناس اللي هم أمي وابوي اللي الحين لو كنت أنا عايش مع أهلي الأصليين؟ هل باشوفهم واعرفهم؟ مين بيكونون أخوياي؟ هل بوصل للشي اللي انا واصل له الحين؟ يمكن أهلي الثانين جا يوم وإحترق البيت ومتنا كلنا ؟ (وأترككم تتخيلون الموقف عاد)ـ

أسرار وصخة وكثيرة عند كل واحد فيكم صغير ولا كبير أم ولا أبو جد ولا جدة, بعضها ماحد يعرف عنها نهائي, وبعضها يعرفها ناس قليل لكن المفروض وعلشان التوازن الكوني
إنت يافلان مفروض ماتعرفها

هذي اللي ذكرتها فقط بعض الأمثلة, ممكن لبعضكم , ماتعني شي حتى لو صار هالمثال, بعضكم اصلا يدري إن أبوه قاتل واحد أو إن ابوه مايحبهم أو إنه متبنى, ممكن هالأسرار ماتعني لبعضكم شي لكنها مجرد أمثلة

وممكن فيه اسرار بسييييييييييطة جداً يعني مافيها لا قتل ولا سرقة ولا خرابيط , وتعني لبعضكم الكثيييييييييييير

خلونا نشوف مثال ثاني وفيه بنهي موضوعي:
تخيل إنك هكر, مخترق ,تقدر تفتح أي شي وتقرا أي جهاز وتتحكم بأي جهاز من أجهزة الناس اللي حولك سواء تحبهم أو تكرههم,حلوين؟
قاعد تراقب أخوياك والعالم اللي حولك وتراقب كل حركة وكل كلمة يقولونها ويسوونها, ودي كل واحد منكم يسرح بخياله ويتخيل وش ممكن يكشتف من أسرار وصخة؟

وش أسوأ شي ممكن تعرفه عن خويك يخليك تكرهه وودك تلعن شكله أو عالأقل ماتماشيه طول عمرك؟
وش الشي اللي ممكن تقراه بمحادثات أحد أخوياك بس ويخليك تكره كل أخوياك وكل الناس اللي حولك وتنعدم الثقة بينك وبينهم ؟

ودك تعرف صدق ؟

صدقني , لو إنت قاعد تراقب, راح تحصل شي بيوم من الأيام يخليك تكره هالناس اللي تثق فيهم للأبد. ممكن يكون سالفة أو حوار دار بينهم وبين شخص آخر ماتعرفه أو تعرفه, ممكن بأحد الحوارات , خويك قال لواحد ثاني إنك إنسان غبي أو إنه كذب عليك في أحد المواقف اللي تهمك أو يمكن قال لشخص أحد أسرارك اللي ماتبي أحد أبداً يعرف عنها.

خلونا نوقف هنا, في اللحظة اللي عرفت فيها هالشي عن خويك وكرهته.

على الغالب إنها بتزق معاك بهاللحظة وبتلعن الساعة اللي عرفت فيها خويك أو بتكبر المصيبة براسك وتحس بحرج جديد لان كل اخوياك يعرفون سر إنت ماقلته إلا لشخص واحد تثق فيه بينهم, كيف بتقابلهم, كيف بتمشي مع ناس مايحترمونك وقاعدين يضحكون بوجهك ومن وراك هم شي ثاني؟ من بقى لك بهالدنيا؟

ممكن الآن نرجع للحظة اللي عرفت فيها هالسر وبديت تكره خويك لحظتها؟ اوكي ,, انت توك مكتشف هالشي

تخيل لو إن خويك بلحظتها أو بعدها بيوم, حس بندم مرة وفكر بينه وبين نفسه, لا حرام اسوي في فلان كذا, غلط اللي انا سويته , والله ماعاد اسويها مرة ثانية , فلان خوته بالدنيا كلها وأنا حمار لاني سويت كذا, يلعن ابوك يابليس اللي خليتني اسوي كذا بخويي(مع إن بليس ماله شغل بالسالفة:P), يمكن خويك يكتشف إن هالشخص اللي تكلم عنك قدامه شخص مايستاهل وكل سواليفه حش بحش باخوياه وجوه وصخ ومايستاهل إن أحد يخاويه, وسحب عليه ويبي يستمر معك لانه يعرفك إنسان كويس.

خويك حس بغلطته ويمكن كانت الغلطة الوحيدة بحياته وحالف بينه وبين نفسه إنه ماعاد يكررها مرة ثانية. خويك فعلاً ذيب ومايسويها , لكن غلط ذاك الليل وسواها ولايبيك تدري عن هالشي اللي هو متفشل منه وممكن بلحظة من لحظات المستقبل يفاتحك بالموضوع ويعتذر منك.
لكن هيهات هيهات, أو على قولة بابا نويل ,هوهوهووو , إنت خلاص الحين عرفت السر ووقفت وقفلت فيك الدنيا, يا إنك بتكون إنسان ضعيف شوي وماتقدر تواجه موقف زي كذا وبتخلي حياتك تمر طبيعي والكره هذا بتخليه مدفون بخاطرك وبتزق في جو نفسك وانت مع اخوياك دايماً, أو إنك بتسوي شي بتندم عليه بعدين, ممكن تقطع علاقتك بهالناس وتخرب عليهم وتسوي لهم المثل وتنقطع علاقتك معهم.

الاخويا مايتعوضون إنت الخسران بهالحالة, والسبب, إنك حشرت نفسك بأسرار غيرك اللي مفروض إنها تبقى أسرار ومفروض إنك ماتدري عنها.

هذا خوي واحد وخسرته وإنتهى, بتروح تبدا بالثاني والثالث والرابع, بتكتشف شغلة عن كل واحد بتخليك تكرهه وهالشغلة مفروض إنت ماتعرفها أو ماحد بالدنيا يعرفها, خسرت أخوياك كلهم, ماعندك ثقة بالعالم , ماعاد فيه احد ودك تمشي معاه او تتكلم معاه, تعقدت حياتك, حبة حبة صرت حتى هندي البقالة ماتثق فيه يمكن يحط لك شي بالموية, حتى المطاوعة بتبدا تشك إن عندهم أسرار بالشكل الفلاني والفلاني(تصورها بعقلك إنت) صحيح عندهم أسرار لكن مش الأسرار اللي في بالك, خلاص ماعاد فيه احد بالعالم يستاهل.

هنا تجي عند البعض النفس الشريرة مع إبليس مع بعض يد بيد ويقولون لك ياخي إذبح نفسك, وش تبي بهالدنيا الفاسدة, العن ابوها ديرة لوووول,

أكيد منت غبي ومنت منتحر بس هالفكرة ببالك ومرت عليك. معنى الكلام, إكتشافك هالأسرار الصغيرة وصلتك للحضيض ياصديقي وأنت بادنى مستوى بحياتك الآن.

السبب اللي خلاني أكتب هالخرابيط, هو إنه البعض من الناس اللي حولي إعترفوا لي بأسرار ماقدروا يمسكونها والأسرار هي :

إنهم إكتشفوا أسرار عن ناس حولهم وإنصدموا بناس يثقون فيهم وبعضهم لما إكتشف هالسر , حاول يسوي شي بخصوص الموضوع, يعدل هالمشكلة لكن ماقدر, والسبب إنه ماوده يتخلص من هالأصدقاء لانه يحب شغلات كثيرة فيهم ماهي محصلها بناس ثانين, وأحيانا بكل بساطة مايقدر يسوي أي شي عشان يواجه هالمشكلة اللي إكتشفها أو يواجه الشخص اللي سوا هالخطأ.

صدقوني, ناس كثير تعقدوا والسبب إنهم يجرون ورا الأسرار, أنا كنت اقول ومازلت أقول, المعلومات قوة, لكن, راح تسبب لك الضعف إذا ماتقدر تتحكم فيها وتنظمها بعقلك بصناديق مختلفة ومخصصة لكل نوع من هالمعلومات.

أوكي, إنت إنسان ملقوف, إعرف الأسرار, لكن خلي كل شي زي ماكان , لا تنصدم أو تغير حياتك لانك إكتشفت سر, يوم من الأيام راح تجي اللحظة اللي تقول فيها (الحمدلله إني ماسويت شي).

ونصيحة للي مايحب يدخل بهالسوالف, خلك كذا , إكتشاف الأسرار ماهو حلو إطلاقاً,

ولهذا السبب إسمها أسرار, الحياة تمشي طبيعية وزي الحلاوة بدون معرفة هذي الأسرار, بل في الحقيقة, الحياة تستمر بأحلى أشكالها بدون معرفة هالأسرار.
وياخبر بفلوس , بكرة ببلاش.

أشكر كل من وصل لهذا الحرف< وقرا كلامي
وأتمنى إن عجبتكم هالطريقة من الكتابة أشوف تعليقاتكم علشان اتشجع وازيد الخرابيط, أو بحول نشاطي واشتغل طباخ عند حسين وإنتهينا

تحياتي
موصاحي

12 comments

  1. Retaj · أكتوبر 30, 2009

    السلام عليكم..
    زي ما انا ماحب الي يدخل راسه في حياتي ماحب اشوف وش ورا الناس ووش ماضيهم الكئيب..
    او انه مايبي الناس يعرفون بعض اسراره العاديه بالنسبه له بس يعرف انها اذا طلعت بتسوي زحمه نوعاً ما وتستجلب شفقة الآخرين والسالفه مب هامته وماشي حياته طبيعي ..
    زي الي عندهم مرض نفسي مثلاً.. او لويه في العائله ماجاب خبرها بس تستجلب النظر بعين الرحمه وعشان كذا هو مخفيه ..
    ثانياً : اللقافه (تكوي)

    /~
    *”نخليها أسرار بيننا وبين أنفسنا وتستمر الحياة ويازيننا ويامحلانا ,”_< مـــؤلم // الكتابة جميلة ماشاء الله ..حلو تزيد من هالنوعيه

    • Mo9a7i · أكتوبر 30, 2009

      مشكورة على قراءتك ومتابعتك وتعليقك ايضا
      وان شالله لو لقيت الوقت بكثر عليكم هذرة التنفيس هذي

  2. "ابتسم رغم الالم " · أكتوبر 30, 2009

    اول شي ” اهنيك ع كوكتيل الالوان هع
    وثاني شي موضوعك ع الجرح قريته وقريت الردود وكل ابو شي :”(
    اكره شي بحياتي لما انصدم بشخص لما تعرف شي عنه
    تعودت بحياتي ما اتدخل باحد ولا انبش ورا السوالف والاسرار
    بس مشكله عندي لما احد يجيك وييقولك سمعت وش صار دريت بهكا
    كانت وحده من صديقاتي احسها عجوز تدور ع السوالف + اخبار الناس تجي تقول دريتي وش صار وهيك كنت ما احب جلستها سوالفها لقافه وحش وهكا
    تجي تقولي عن سوالف ما ادري من وين تجيبها مرات انصدم نفسيتي زفت لما دريت عن وحده انها هكا اقول لا شكلها هي تكذب وطلعت عنها هالحكي :”(….
    بعد سنتين صداقه ما عاد تحملتها تركتها صرت الحين بالجامعه اشوفها كأني ما اعرفها قلت لها مره بوجها وش عليك من الناس؟! وتلاحظ ما تحب احد يسالها او يعرف شي عنها
    طيب ليه تدورين سوالف الناس ؟!
    صرت وحدانيه + تعاملي سطحي بدونيا والناسات + اعطي ثقه 10%
    لا تعطي سرك لاحد لانه مستحيل يسكت اكيد بتكلم ”
    وربي كلامك جد تكره الدنيا لا انصدمت وعرفت شي عن شخص
    تحس ما عاد ودك تشوفه ما عاد تواطنه بعيشه الله
    “”تقعد تفكر وتهوجس ليه كذا؟! وش يحس فيه !معقوله هو سو هكا “”
    تصير علاقتك معه مجامله !!! تسلم بس في خاطرك شي عليه :”(
    يعني خلك كذا تعاملك عادي لا تحاول تعرف شي صح صديقك مرات بيحش فيك
    بيعلق عليك وهيك بس لا تحاول تدور وش قال ؟! وليه ؟ من هالاسئله

    << بتقعد وتسولف وتكمل على موضوعك ( ايقونه تصيح من قلب ) شكرا يا بطل ع هيك موضوع متابعه لك ^^"

    • Mo9a7i · أكتوبر 30, 2009

      اهليين استاذة ابتسم
      مشكورة على تعليقك وحياك الله بالمدونة باي وقت تشرفين

      بالنسبة لمسألة إنك صرتي وحدانية لان الناس ماحد يحب يخلي احد
      ليه ماتنظرين لهالموضوع من زاوية ثانية
      وتقولين إنك إنتي مثلاً , عادي بتعيشين مع الناس عادي
      وهذولا اللي يطلعون اسرار ويبربرون كثير (صحيح طباعهم شينة)ـ لكن , تعتبرينهم مصادر معلومات لك << صحيح مو شرط ان معلوماتهم صحيحة
      بس مصادر معلومات ,, ومافيه دخان بدون نار

      انتي طبعاً لا تطلعين اسرار احد, والأسرار اللي تجيك إحتفظي فيها لنفسك واستفيدي منها لنفسك بس
      اعتقد إنه صحيح إنه غلط لما تعرف اسرار ناس كانوا كبيرين بعينك بعدين طاحوا من عينك بعد ماعرفت عنهم هالسوالف
      لكن,
      مفروض نعرف إن هالشي طبيعي وكلن له اسرار ومافيه احد كامل
      وان عرفنا اسرار شينة زي كذا , نحس إننا أفضل من غيرنا والحمدلله إنا بخير

      حياك ونورتي

      تحياتي
      موصاحي

  3. Mo9a7i · أكتوبر 30, 2009

    لوووول استاذة وش ذالطفش

    في الردود والتعليقات , يبين اللي قرا الموضوع واللي ماقرا :p

    انا قلت بالأخير إنه المعلومات قوة , وعادي فيه ناس ماتقدر تقاوم, وماهي مشكلة , تلقفوا وشوفوا الأسرار وكذا
    بس الواحد يحاول يقوي نفسه بحيث إنه لما يعرف سر , مايخلي هالسر يغير حياته
    أبسط مثال, لما تكتشفين مثلاً إن أحد الناس اللي حولك حمار وفيه غباء وكذا , طبعاً هالموضوع كان سر ,, لما تشوفينه المرة الجاية مو تضحكين بوجهه
    مشي الموضوع عادي
    وقيسي على هالسالفة ,,

    لما تعرفين سر يخليك تكرهين شخص , لا تكرهينه , إحتفظي بالسر وإستفيدي منه بإنك تعرفين هالشخص أكثر , لان كل الناس عندهم أسرار ماهي زينة , ماتقدرين تكرهين الكل ,,

    لوووول ومشكورة على تعليقك ومرورك :p

  4. wesh tha al6fsh · أكتوبر 30, 2009

    قد قالك أحد في يوم أحد انك موب صاحي ؟ << يادمك

    الحين انت قصدك بعد الهرج اللي فوق اننا مانتدخل في شؤن الغير ؟
    والله اتحدا ابن امه مايتدخل في خصوصيات الغير , لاتقولي فيه .. الانسان مايصير انسان اذا ماكان ملقوف ..بعدين اللقافه حلووه .. تونسس ..
    اذا كان هذا قصدك فهذا ردي ..
    واذا كان قصدك غير فحمدلله مافهمت ششي ..

    لو عندي جريده .. مسكتك رئيس التحرير << اعتقد كيذا اسمها ..
    موقع شخصي ولااحلى ..<< مافيها تكتب WordPress

    تمـــــــــــــــــــــت ( بين قوسين ورده )

  5. Mo9a7i · أكتوبر 30, 2009

    ههههههههههههههههههههههههههههه

    عجبني ردك
    وصح عليك انت فهمت الموضوع صح لوووول
    الواحد في عملية التنبيش عن الأسرار ممكن يواجه المشاكل
    هذا طبعاً غير المشاكل اللي تجيه بعد ماينبش ويعرف هالأسرار

    اما سالفة المجلدات الواجد اللي جنب بعض هذي سالفة لوحدها ههههههههههههههههههههه عاد قمة القهر لما عقب التفتيش ذا كله تطيح بمجلد فيه ملف txt
    وتخيل وش بيكون مكتوب لك في هالملف

    اكيد إنك ماراح تعلم احد وبتسكت وتخليها سر بينك وبين نفسك ههههههههههههههههههه

    الله يسلمك عالمرور الحلو والفلسفة الأحلى واللي ابيها وانا مهتم فيها هنا

  6. سندوتش مندي · أكتوبر 30, 2009

    الصراحة مدري هالموضوع جديد ولا Used

    قريت الموضوع من أول حريف لأخر حريف وأتوقع بأنك تقول عن سالفة أسرار ؟ مو صح ؟ 😀

    أيه صح الأسرار مشكلة والمشكلة الأكبر أنه لو الواحد قام يبحث بالمجلدات الي بسطح المكتب في كمبيوتر أخوه أو شي مثلاً وينصدم يلقى المجلدات فاضيه فهنا راح يدور في عقله بأن أخوه أو راعي الكمبيوتر مسوي لهم مخفي يقوم يفعل تصفح المخفي ويطلع بعد مافيه شي فهنا يبدأ هو ونفسه الشريرة في التفكير بأن أخوه كان حاط شي وحذفه فيقوم يروح يقول لأخوه : آسف تراني حذفت الي بالمجلدات حقك بالغلط !! يبي يعرف أخوه وش ردة فعله .. فلو شاف أخوه عصب يعرف أن أخوه حاط شي مو زين من أبو طفي اللمبة لاهنت !! وإن مازعل فيكون أخوه حاط ملفات عادية بس المشكلة إن زعل أخوه وقال فيه ملفات العمل !! هنا المشكلة تبدأ تشك أنه يستهبل عليك ويبي يسوي فلم أو مدري شي غلط صاير في خشته تقل يضحك ويبكي !!

    فالأفضل لا يقعد يهايط ويسوي نفسه أنا الذي أعرف كل شي .. وياكل تبن وينطم ويتحمد الله على الحال الي هو فيها ولا أقسم بالله لا أتوطى بطنه < شوي شوي وين طاير أنت ؟ ههههههه 😛

    المهم شكراً على الموضوع الي قمت تفلسف فيه ولا يكثر

  7. Mo9a7i · أكتوبر 30, 2009

    ههههههههههههههههه
    أهم شي إنك قريته من الجلدة للجلدة

    بالنسبة للسر العميق اللي دخل في شلتنا, هذي كانت تجربة ودراسة قاعدين نسويها انا وارراشونل , ونبي نشوف مقدار التفكك الأسري اللي بيصير في شلتنا جراء إفشاء مثل هذا السر البسيط

    ومن تعليقك إتضح لي إنه إفشاء هالسر سبب لك مشاكل عاطفية تجاه الشلة بحيث إنك بديت تفكر إن فيه بعض تصرفاتك غلط وإحتمال كبير بتغير من شخصيتك علشان ماعاد الناس يقولون مثل هالكلام , حتى إنك ممكن تقعد تصارخ وتنفجر بس علشان تقول للناس إني قسم بالله تغيرت وأانا مو كذا, التفكير قد يولد لديك حالة إنشقاق وإبتعاد عن العالم لبرهة من الوقت بحيث إنك تحاول تدور من أنت فعلاً , وتقعد تطلب راي الناس في نفسك وبعضهم بيقول وش في امه هذا ,, والبعض الثاني بيقول حرام عليك محمد والله إنك حبوب وشحليلك ومن هالكلام الزبدة إنك بتنهار عصبياً.

    وإنه تسبب للي مو معنا في القروب بإنحشار نفسي إنزوائي أدى إلى إنه ماوده يقعد معنا وحس إنه ماهو مندمج مع المجموعة اللي كان يحس بالإنتماء إليها سابقاً

    هذي بعض الأضرار وسنستمر في مراقبة التطورات من أثر إفشاء هذا السر وإن شاء الله نحط النتايج هنا يوم من الأيام

    تحياتي لك ولشخصك الكريم ولمرورك حضرة الضابط وإذا حصلت أي شي مخالف في الموقع حقي علمني أبشر أزيل أم أمه بس لا تعلم تكفى

  8. Photo Reading · أكتوبر 30, 2009

    ماعليك من النك نيم ياصقيقي .. تراني قريت المقال من الجلدة للجلدة << كتاب مو مقال… هع

    يقول المثل .. من دق باب الناس دقو بابه …

    اذا كنت بتجري ورا اسرار الناس … تذكر ان عندك اسرار ماتبي احد يركض وراها

    وكلامك صحيح فيه اسرار لو تكتشفها ممكن انها تلخبط تفكيرك شوي …

    واقرب مثال السالفة اللي صارت بيننا احنا واللي مو معنا في القروب لوووول ..

    يعني انتو يوم قلتو السالفة له طلبتو منه لايعلم … وانا كنت عايش معاكم طبيعي و عادي…

    يوم دريت عن السالفة … خلتني افكر في نفسي شوي .. ممكن اكون ان فعلا تصرفاتي فيها شي منا الغلط سبب لهم هالتفكير … او ..او ..او…… << ذيب يعوي قلبت لوووووول … و ممكن ايضا الشخص اللي مومعنا في القروب هع يكون يوم قلتو له عن هالشي خاف او تضيق بمعنى اخر لو انه مادرى احسن ولو اني مادريت احسن ……. << هذا كان مجرد مثال عابر ..لكلامك اللي قلته ..

    مع انه ايضا سر بيني وبين نفسي و كشفته لكن الضرورات تبيح المحظورات ..

    والله والله انا احبكم صدقووني احبكم <<< شر النفوس 2 هع

  9. Mo9a7i · أكتوبر 30, 2009

    في الحقيقة أستاذ إرراشونل , أنا أشكرك من صميم قلبي لانك الأستاذ الوحيد اللي كرمني برده وقدرني شوي على تعبي أصابيعي تقطعت وانا اكتب , وأثريت موضوعي بالنقطة الثانية من ردك

    أما النقطة الأولى من ردك صراحة مادري وش تبي, ماعندك سالفة
    كلام طويل عريض ومسوي لي اربع سطور على قطعة حلا زاقة عليها ذبانة ؟
    وش هالكلام ياخي عيب
    مابقى إلا هي , آكل حلاوة جاية عليها ذبانة؟ , قل الحلى بالدنيا ؟

    تحياتي لشخصك ومرورك الكريم

    لول :p

  10. Irrational · أكتوبر 30, 2009

    أنا تعليقي على قسمين ،،

    الأول
    من هذا المبدأ اعتقد انهم يقولون الجهل نعمه ،، بعض الاشياء احسن لك ينقص عليك ولا تعرفها ،، يعني مثلا اذا جات ذبانه على اخر قطعة حلى ،، و انت مرره تحب هذا الحلى ،، ماراح تتمنى انك ماتدري ؟؟؟ لأنك ماراح تعامل الحلى بالشكل اللي بالعاده تعامل الحلى .. و كذا انت خسرت الحلى .. بينما لو ما تدري لا والله انك بتحطها بثمك و أغلب الظن موب جايك سوء ..

    يعني لو مادريت كان عادي ،، بس بما انك دريت بتسوي فيها الصحي و الانسان اللذي يهتم لما يضعه في فمه و بتخسر حلى غالي على قلبك

    النقطه الثانيه

    كل تبن و ليتهم رقدو

    لول