الخدمات الإلكترونية | وزارة الداخلية , أخيراً وبعد طول إنتظار

كثير منكم سمع عن e-Government  عندنا بالسعودية وووووو كلام من يمين ويسار ومن هالسوالف

الحمدلله, أول بوادر هذا النظام بدت تطلع عالنت, بوابة إلكترونية لمعلومات الشخص بوزارة الداخلية

وزارة الداخلية

http://eservices.moi.gov.sa

تقدر تسجل دخول بالبطاقة أو اليوزر والباسورد أو رقم بطاقة أحوالك, , أتوقع هالشي راح يكون للبداية فقط وبالمستقبل لازم الواحد يدخل بيوزر وباسورد.

السبب إنه حالياً العالم ماعندها يوزرات ولا باسوردات ولا لهم معلومات مسجلة بالسستم, ف يحتاجون يخلونها سمردحة شوي ولو إنه ممكن يصير مشاكل, لكن المشاكل هذي سهل حلها.
الموقع راح يعرض لك شغلات بسيطة حالياً ووظائف قليلة

  • راح يعرض لك إذا إنت قد بصمت ولا ماقد بصمت
  • تقدر تحج هالسنة ولا ماتقدر تحج
  • كم عندك عامل
  • وبعض المعلومات عن العمال
  • وكم مخالفاتك بالمرور وكم قيمتها
  • وتاريخ اخر مخالفة ومن هالسوالف
  • طبعاً من خلال الموقع أيضاً تقدر تحدث بياناتك اللي يحتاجونها الإدارة العامة للمرور
  • تقدر تحجز مواعيد ببعض الدوائر الحكومية
  • وفيه بعض النماذج اللي ممكن تحتاجها لإنجاز بعض المعاملات بالدوائر الحكومية.
لكن حلو جداً إن المعلومات هذي كلها صار تقدر تطلعها من مكان واحد, وهالشي يعني إنه صار فيه centralization عندنا بالبلد للمعلومات وهالشي راح يغير من الأحسن للأحسن وبسرعة.

5 comments

  1. الشاعر · أغسطس 10, 2010

    أنا مسجل في الموقع من سنة تقريبا ونسيت كلمة السر حاولت أطقق وأتذكر وأكتب اللي متذكرة دون فايدة .. سؤااااااالي : كيف أقدر أدخل ألحين .. لاتقول سجل من جديد

    • Mo9a7i · أغسطس 10, 2010

      والله كنت أتمنى أشوف تطور بهالموقع بشكل أسرع.
      لكن يبدو لي إنها زيادة فلوس بالحكومة وفشوها على شوية مبرمجين سووا لهم الموقع وإنحاشوا.

      مافيه تطورات مافيه مكان لإرسال الإقتراحات او الشكاوي أو غيره.
      مادري إذا يسمحون بإعادة التسجيل من جديد ولالا, ماقدر افتيك حقيقة بهالموضوع.

  2. nnn · أغسطس 10, 2010

    للاسف ماستفدنا شي

    يعني الي نبي نعرفه وش اللي اضاف للمعاملات ..؟ وش نتايجها بعد ؟

    • Mo9a7i · أغسطس 10, 2010

      المعذرة اخوي توني ارد عليك, مادري ليش ماعاد توصلني رسايل على إيميلي لما يجي فيه تعليق جديد
      عالعموم, انا عارف الموقع داج ومايقارن بأي شبيه له بالدول الثانية
      بس أقدر اقول إن فيه إهتمام من هالناحية وفيه حركة جديدة من ناحية الدوائر الحكومية عندنا
      والعملية تزداد صعوبتها مع زيادة عدد السكان, لكن إن شاء الله مع الجيل الجديد من ابناء الوطن والتعاون الاكثر مع الجهات الحكومية أحس إن هالعملية ماراح تكون صعبة مرة. لكن الدولة تعطي شوية ثقة للمواطن والأمور تصير بخير.
      <<<< إذا مااشفتوني ارد بالمدونة بالمستقبل القريب بالله اسألوا عني!

  3. Dhaifullah · أغسطس 10, 2010

    شسمه يعطيك العافيه ع التنبيه ,,, بس للآسف حاولت قبل كم شهر احجز موعد على الاحوال عن طريقهم ومانجح

    مادري حالياً اذا ضبط ولا لا , بس على فكره تقدر تخش موقع الداخليه وتطق تسجيل الدخول ثم بياخذك لشاشه ثانيه وبرنامج غير هذا تسوي لك يوزر فيه وتشوف كل معلوماتك بالاحوال والمرور والجوازات وكل شي وتنفذ جميع الخدمات الالكترونيه ..

    وفيه موقع انترنت . قوف . اس اي . تسوي لك يوزر وتفعله من مكتب العمل بالرياض و يصير مربوط بكل القطاعات الحكوميه ,, وحالياً وزارة التجارة تقدر تطلع سجل تجاري بالرياض بالنت , بس كمان مليان مشاكل وحاولت فيه ومانفع

    اللهم عجل حلول مشاكلهم

    تقبل تحياتـي ..