iBlueNova يعيد حياة البلوتوث للآيفون

البشااااااااااارة يالربع

كولوولولولوولولولوليش

أخيراً وبعد طول إنتظار

تم إصدار أبلكيشن البلوتوث البديل للآيفونات 2g و 3g و 3gs بنوعيه الجديد والقديم ليتيح لمستخدمي الآيفون كافة مميزات البلوتوث الممنوعة من أبل

إسم البرنامج iBlueNova 2.0 كان يسمى iBluetooth سابقاً للمبرمج MeDevil(أخخخخ لو يعطيني مخه ثلاث ايام ونص اسوي لي 5 برامج بس)

iBluenova interface

واجهة آي بلونوفا

يمكن إيجاد البرنامج في السيديا بقيمة 5.99 دولار وأعتقد هذا السعر قليل بحق المبرمج ولكن على كل حال فيه إمكانية المكاسر, تقدر تدق عالمبرمج وتحاول ينزل لك كم سنت من هنا ومن هنا بالإضافة إلى ذلك

بإمكان الجميع تنزيل البرنامج بدون دفع اي قرش وهذي الميزة تنفع القحيطية , فترة تجريبية لمدة 15 يوم بعدها تحتاج ترخيص البرنامج او شراءه او إنتظار نسخة مكركة منه < مع إني مانصح فيها

بأسفل التدوينة صور للبرنامج مع شرح بسيط لبعض المميزات

سأقوم بعرض بعض المميزات والعيوب التي تم إكتشافها خلال الساعتين الأولى من تجربة البرنامج

مميزاته:

  • 1- إرسال الملفات والصور بجميع أنواعها من الآي فون لأي جهاز جوال آخر يدعم خاصية إستلام وارسال الملفات
  • 2- إستقبال كافة أنواع الصور والملفات من كافة أنواع الأجهزة
  • 3- إمكانية تشغيل أو إغلاق خاصية الـ Discovery بحيث يمكن للأجهزة الأخرى رؤيتك أو لا
  • 4- تغيير إسمك الذي يعرض في البلوتوث
  • 5- إمكانية البحث الآلي عن أجهزة البلوتوث القريبة
  • 6- إمكانية إختيار تحويل الصور قبل إرسالها إلى صيغة jpg
  • 7- إختيار أماكن حفظ الملفات المستلمة بأنواعها , الفديو بمجلد معين والصور بمجلد معين والصوتيات بمكان معين ويعني , الواحد يقدر يرتب عفشه او يخليه حوسة على كيفه

عيوبه:

  • 1- طبعاً دعمه للعربي الظاهر لك عليه شوي, أسماء الأجهزة العربية بعضها يطلع صح وبعضها لا
  • 2- الملفات اللي إسمها بالعربي برضه ينصك جنبها أحياناً ومايستلمها
  • 3- صديقي Fahad Alzanbaqi إكتشف أيضاً إن البرنامج مع الملفات اللي حجمها اكبر من 5 ميقا أحيانا مايرسل
  • 4- ماتقدر تسوي إقتران أو تحط الجهاز موثوق به بحيث إنه يرسل لك بدون تنبيه, لازم تسوي قبول كل مرة
  • 5- ماتقدر تستقبل مجموعة ملفات مع بعض , تستلم واحد واحد

في النهاية البرنامج يعتبر زي العسل بحلوه ومره ونعمة بدال البلوتوث العقيم اللي كان قبل هالبرنامج , وأنا شخصياً واثق تمام الثقة إن البرنامج بيفوق توقعاتنا في الفترة القادمة عن طريق التطويرات وتشجيع المطورين حقينه وهيك وبناكل كيك

بنحاول من خلال التعليقات بهذي التدوينة نذكر المميزات اللي نسينا ذكرها والحلول والعيوب وأي شي جديد خلال هاليومين بالنسبة للآي بلونوفا ف شاركونا حياكم الله على بلوتوثكم

صور من البرنامج:

اول شي تشوفه بالبرنامج

اول شي تشوفه بالبرنامج

هذا أول شي تشوفه بالبرنامج

طبعاً

Enable علشان تفعل البلوتوث والبرنامج

Visible علشان تخلي اجهزة البلوتوث الثانية تقدر تشوفك , تقدر تخليه يولي إذا تبي ترسل بس وماتستلم

طبعاً تحتها الفايل منجر

هذا إذا بغيت ترسل ملفات , تختار من الفايل منجر اي ملف وتطق إرسال ويرسله , الصور بيفتح لك كل صور الجهاز ويعرض لك مساراتها

والفديو أيضاً بيجيب لك مسارات الفديو على جهازك وتختار منها

والامور الباقية برضه نفس الشي

بعض الخرابيط الأخرى

بعض الخرابيط الأخرى

هنا نشوف أكتيفتي

الترانسفير ,, اللي هو الملفات اللي قاعدة تنقل الآن أو تم نقلها واستلامها أو اي شي الزبدة يعرض لك هنا تقرير باللي صار واللي قاعد يصير

تحته

Device Discovery هنا إذا بغيت تبحث عن الاجهزة اللي حولك وتضيف للمفضلة أو شي زي كذا

تقدر تضيف أجهزة للمفضلة , لكن ماتقدر تعطيهم صلاحيات إقتران أو إنهم يرسلون لك بدون ما يجيك تنبيه مثلاً

هذي صورة توضيحية

Discovery

Device Discovery

وتحتها السيتنقز اللي هي الخصائص وصورها بالأسفل

iBlueNova Settings

خصائص أو إعدادات الآي بلونوفا

زي مانتوا شايفين يقول لي إختر إسم جهازك للعرض قدام الناس

وتحتها معطيني الأدرس (العنوان الخاص) حق البلوتوث حقي, مثل الآي بي لكن للبلوتوث يكون شكله كذا

تحتها البحث التلقائي لو بغيته يبحث تلقائي عن اجهزة بلوتوث جديدة وانا اتحرك, لكن ماحس إني أحتاجها وبتستهلك بطارية

تحتها الهزاز , مادري ليش بس طنشته

تحتها خاصية مادري وشهي حقيقة

بعدها المجموعة اللي بعدها

Security

هذي لو حبيت إنه أي تواصل بينك وبين أي جهاز يكون قبله رقم سري, تحدد الرقم السري أو تلغيه زي ما أنا ملغيه كذا مايحتاج , الناس ثقة وماله داعي هالحواجز بيننا

Settings Cont

تكملة الإعدادات والخصائص

هنا يقول لك لو حاب يحول الصور لصيغة JPG قبل الإرسال

وتحتها يقول لك إذا تبيه يحفظ الصور المستلمة بمكتبة الصور بجهازك مباشرة بحيث تنعرض مع صور الكاميرا

اما مجموعة الخيارات اللي تحت

Pathes

هذي اذا بغيت تحدد فيها كل نوع ملفات وين ينحفظ, تختار وين تنحط الصور ووين تنحط الفديو وهالسوالف  او تخلي كل شي زي ماهو عليه

إنتهى

9 comments

  1. شوشو · فبراير 15, 2010

    مشكورررررررر جدااا يا باشاش

  2. khalid · فبراير 15, 2010

    نزلت البرنامج بس فيه مشكله اذا دخلت برسل صورة يطلع برا البرنامج ليييه
    وشو الحل ضروري

    • Mo9a7i · فبراير 15, 2010

      اهلين اخوي خالد

      البرنامج لسا مايدعم الأيفون الجديد ولا نظام التشغيل الجديد
      واتوقع هذي مشكلتك
      إنتظر تحديث وان شاء الله تزين الأمور

  3. Fahad24 · فبراير 15, 2010

    يعطيك الف عافية اخي Mo9a7i ، مقالة رااااائعة اهنيك على ها الابداع حيث شملت جميع النقاط الرئيسة. وبالتفصيل الممل. استمر بهذا المجهور الرائع حيث انني سوف اكون اول المشجيعن لك ، وباذن الله سوف يصبح من المواقع المشهورة قريبا.. تحياتي =) 

    • Mo9a7i · فبراير 15, 2010

      هلا اخوي فهد
      نورت المدونة, ودي إنك تشاركني بسالفة التحليل لهالبرنامج إن حصلت فيه شي جديد او طريقة او شرح له, تفضل وخبرني وإن كان ودك تكتب معاي بهالمدونة تراكم تنورون
      بلغوني بس اللي له خاطر ونرتب سوا هالموضوع

      بالنسبة لإشهار المدونة والله ماني ادور هالشي,
      حاب إنها تكون مثل المكان اللي الواحد يزوره من فترة للثانية , لانه موقع شخصي تقريباً وحاب احط فيه الاشياء اللي تهمني وأكيد إنها بتهم ناس كثيرين مثلي ف كل هدفي بالموضوع إن الناس يحطونه بالمفضلة عندهم , يوم من الايام طفشانين يسيرون ويقرون هالسواليف ويمكن يحصلون لهم شي يعجبهم

      واكيد يشرفني مروركم دايم بس لا تكثرون جيات ويخلص الباندوث علينا
      :p

  4. soso · فبراير 15, 2010

    .. لووووووووول .. اوكي انا بس حبيت اضيف معلومه ..

    … والله يهنيك بالبرنامج … وبستنا جديدك 😉

    • Mo9a7i · فبراير 15, 2010

      لووول اوكي استاذة سوسو انا ماكان قصدي اغالطك بالكلام
      كلامك صحيح وكلامي وجهة نظر فقط ممكن صحيحة او خاطئة , وخلينا نشوف وش يسوون بالأيفون 4 الجاي

  5. soso · فبراير 15, 2010

    .. على فكرا هما كانو يقدرو من البدايه يعملو في بلوتوث ويريحونا

    وبالعكس حيستفيدوا وحتنضاف ليه ميزه جديده .. بس هما ما عملو عشان لا تدخل

    فايروسات ع الجهاز .. وشركه ابل ما كنتوش نفسها صرجت بانهامو مسؤله عن

    تصليح الجهاز اذا خرب ..

    • Mo9a7i · فبراير 15, 2010

      مانبغاهم يصلحون جهازنا اذا خرب
      احنا نصلحه والمحلات كثير تصلحه ومافيه أسهل من الـ
      Restore

      لكن دخيل الله يخلونا نعيش مثل باقي الجوالات
      الايفون احسن بكثير من باقي الجوالات بس بعض الجوالات الثانية افضل من الايفون بحاجات اساسية مثل البلوتوث واللي كان ممكن إنهم يخترعون لها حل,
      والفيروسات جاية جاية, رضت أبل ولا مارضت