iMo9a7i جوال الرياجيل

طبعاً أنا من الناس اللي يحتقرون البلاك بيري ويحتقرون حامله ومستخدمه وبائعة والمعين عليه والمشجع له وكل من تسول له نفسه إنه يقترب من هذا الجهاز أو ينظر بنظرة رضا إلى أي شخص آخر موافق على هذه التقنية الخائسة!

لكن , هذا مو موضوعنا, موضوعنا إني كنت برضه ماني مقتنع بالآي فون,
كنت اشوفه جوال عادي مثله مثل اي طابوقه أخرى من الجوالات اللي ينشق المخبى من ثقلها وماكنت متحمس له ابد, يعني شي عادي (اهم شي إنه مو بيدين المبزرة)ـ
لكن,
دعت الحاجة في أحد الأيام إني أفكر واخطط واتدبر في مسألة إني أشتري لي أيفون, لغرض واحد فقط كنت محتاجه
اللي هو , برنامج من برامجه إسمه iWHMCS تبع شركة http://www.whmcs.com

مالكم بالطويلة , البرنامج هذا ممكن مايهمكم لكنه كان يهمني أنا

جهاز الآيفون
جهاز الآيفون

سويناها وصكيناه وما أدراك مالذي صكيناه
iPhone 3Gs ويااااحبي له
كلها ساعتين من يوم شريته وانا اللي اندعس من حبه ياااااااااالبا خراطيش شاشته وحس سماعته.
فعلاً
ماينلام صاحب الايفون اللي وسوس بالأيفون , هذا فعلاً جهاز الرياجيل مو البلاك بيري عليه اللعنة
الجهاز مايحتاج , بعد تطويرات أبل الأخيرة صاير أكثر من روعة
  • -كاميرا 3 ميقا بيكسل تصور صور عادية وفديو
  • -توسيع للرام وصل 256 ميقا
  • -مساحات كبيرة للذاكرة الداخلية 16 قيقا أو 32 قيقا
  • -خاصية ال voice control : أي شي تبيه , تتصل على أحد , تفتح برنامج تحوس , تقدر تقولها بصوتك ويشتغل اللي تبيه
  • – بوصلة منه وفيه , توريك الشمال وين وانت وين ملقي
  • – ضبطوا البطارية صارت تطول أكثر
  • – خاصية جديدة Locate My Iphone مع MobileMe تقدر تحدد الايفون حقك لو إنسرق أو ضاع او صار فيه شي وين مكانه
هذي طبعاً الخواص الجديدة اللي اضافوها , غير القديمة اللي كانت منه وفيه
الجهاز سعره صحيح غالي شوي (<<مادفع شي من جيبه) بس إنه فعلاً لو ادفع فيه 5 الاف , سعره فيه.
طيب, الحين بقول لكم أحلى حاجة بالأيفون وهي سر حبي له:
بكل بساطة, السر هو , البرامج والتطبيقات اللي تقدر تركبها عليه
علشان أسهل عليكم الموضوع, بحط لكم البرامج اللي انا ركبتها ووظيفة كل برنامج إيش

نبدا بإسم الله:
  1. aNote : هذا من أول البرامج اللي ركبتها وهو بكل بساطة ,برنامج مرتب وواجهتة حلوه مرة اقدر اسجل فيه ملاحظاتي, طبعا مسوي فيه مجلدات مختلفة (العمل,البيت,أمور باسويها,أمور بأشتريها,اشعار) وبكل مجلد احط ملاحظاتي بشكل رايق وفلة.
  2. FaceBook : مايحتاج اشرح واقول وش وظيفته, الفيس بوك بجوالك, شوف العالم, شات مع أخوياك, تصفح الصور, إرفع صور جديدة, إكتب عالـ Wall , كلش كلش للفيس بوك فيه.
  3. FML : ماودي حقيقة أشرح لكم هالشي لكن إبحثوا عنه بالنت وبتعرفون وشهو لوول.
  4. Google : تقريباً قوقل بشكل كامل في جوالك . البحث Docs التقويم , الصور , الترجمة , الخرايط
  5. iWHMCS : طبعاً هذا البرنامج اللي شريت عشانه الأيفون, اقدر اربط جوالي بسكربت WHMCS الخاص بالإستضافة (إدارة العملاء, التذاكر, الطلبات الجديدة) كلش يجيني عالجوال
  6. eBuddy Pro : برنامج مسنجر , yahoo,msn,aol,icq, كلو كلو , تقدر تشغل اكثر من مسنجر بوقت واحد تسولف ترسل صور كلو
  7. iFile : برنامج يهم أصحاب الأيفون , يقدرون من خلاله يتصفحون ملفات ومجلدات الايفون
  8. Shazam : هذا برنامج رهيب لووول, وش وظيفته ؟ أول ماشغله يصير فيه زر في نص الشاشة , إذا انا في مرقص مثلاً لووول أو بالسيارة أو بأي مكان وسمعت اغنية وحاب أعرف إسمها ومعلومات عنها , أطق الزر هذا , يسجل 10 ثواني من الاغنية , ويعطيني إسمها واسم المغني ومعلومات عنها وصفحة لها باليوتيوب وكذا (عيبه بس عالأغاني الإنقليزية)
  9. Skype : مايحتاج بعد اشرح عن هذا
  10. WordPress : برنامج رابطه بموقعي هذا , موقع موصاحي, أشوف فيه التعليقات , أكتب مواضيع جديدة واتحكم بموقعي من الجوال
  11. aTube: انزل مقاطع اليوتيوب اللي تعجبني على جوالي واتفرج عليها بأي وقت ثاني.
  12. Flixter : يجيب لي آخر الأفلام اللي طلعت بالعالم , سواء سينما أو دي في دي , معلومات عنها وراي الناس وهيك
  13. Episodes Lite: نفس فكرة الأول , بس يعطيني أخبار المسلسلات وش أخر جزء طلع وش آخر حلقة وملخصات عنها
  14. iBlackList : <<< رهييييب , عندك ناس ماتبي ترد عليهم ؟ مزعجين دين أهلك بالرسايل او بالمكالمات؟ حط ارقامهم بذالبرنامج وعلمه وش يسوي فيهم (يعطيهم بزي) أو يخليهم يدقون لين يموتون مايرد عليهم , يمسح رسايلهم او او او او,,, مايحتاج تكلم الإتصالات ولا موبايلي تقول لهم احجبوا الرقم, إحجب إنت بنفسك
  15. USB Drive: هذا برنامج يخلي الأيفون حقي كنه فلاش ميموري أو هاردسك خارجي, إذا شبكته بكمبيوتر , أقدر اشوفه كنه فلاش ميموري واحمل فيه ملفات وامسح ووووو
  16. MobileLog : هذا يضيف خواص زيادة لقائمة المكالمات اللي عندك.يسجل كل رقم دق , كم مرة دق عليك واوقات المكالمات هذي ومدة كل مكالمة يعني تدخل مثلاً إسم أي شخص , وتشوف آخر المكالمات اللي بينك وبينه ومعلوماتها
  17. pTerm: أصحاب السيرفرات يهمهم هالبرنامج , يوفر لك خاصية الشل من جوالك , تدخل تتحكم بسيرفراتك وانت برا البيت
  18. fileApp : برنامج يخليك تشغل ملفات البور بوينت والإكسل والوورد والبي دي إف وكولو , وتقراها عالجوال
  19. NoktM7shsh: برنامج نكت محشش, فيه عدة تصنيفات وبكل تصنيف فيه نكت محششين مختلفة , فلة وقت الطفش إدخل واقرا
  20. iPray: يجيب لك مدينتك وأوقات الصلوات فيها ويشغل لك أذان عند وقت الأذان (تقدر تحدد الصلوات اللي يأذن فيها واللي مايأذن فيها)
  21. whiteNoise: برنامج رهيب, فكرته , إن بعض الناس يحبون ينامون على اصوات معينة , بعضهم يحبون الهدوء مثل اصوات الامواج , أصوات هوا , اصوات مطر , وبعضهم يحب الإزعاج , صوت تلفزيون مخرفش , صوت طيارات , صوت قنابل لوول يشغلها لك لمدة إنت تحددها ويقعد يهدا يهدا يهدا بالصوت لين تنام
  22. Trapster: ليه تشتري كاشف رادار وانت عندك أي فون؟ هالبرنامج تشغله وانت ماسك خط مثلاً, إذا كان فيه نقطة تفتيش قدامك أو رادار أو كاميرا سرعة أو تقاطع خطر , ينبهك قبل لا توصلها. طبعاً فكرته هي إنه انت مثلاً لو شفت رادار تبلغ عنه بالبرنامج وهو يحفظ المكان, ولما يجي شخص ثاني ينبهه ,, الناس خلقه ماخلوا شي حاطين كل الرادارات ف انت شغل وانتبه بس
  23. AroundMe: هذا إذا كنت محتاج صرافة ضروري أو محتاج محطة بنزين أو مطعم أو مقهى أو مستشفى أو فندق , يحددد مكانك ويعطيك أقرب الخيارات اللي حولك وخريطة لهم
  24. Contact By Number : فيه احد دق على جوالك الثاني او جوال واحد من اخوياك وقال لك خويك شوف هالرقم مسجل عندك ولا لا؟ مايحتاج تتعب نفسك وتكتب الرقم كامل , إكتب مثلا 050482 وهو يجيب لك كل الأسامي اللي يبدون بهالرقم , وإن ماكان فيه احد بيقول لك مافيه احد ف مايحتاج تكمل الرقم للأخير
  25. WhosHere : هذا برنامج رهيب ويطقع لمسنجر البلاك بيري الف مليون مرة. هو برنامج شات, بس يجيب لك الناس اللي حولك واللي مركبين البرنامج, يجيب لك بعد الشخص عنك مثلا 1 كيلو او 1.5 كيلو وإسمه وجنسه وعمره وتقدر تسولف معاه وتضيفه وتشوف صوره إن كان هو ناشر صور, تضيف ناس للمفضلة ووووو . (كثير ناس مركبينه).
  26. iPTT : البرنامج اسمه i Push to Talk , زي الكينود اللي يعرف الكينودد, جهاز مراسلة وسوالف ,فيه قنوات , لها ارقام تدخل وتسولف بالصوت. مليان ناس
  27. WiFiFoFum : برنامج يعتمد عالمشاركة مثل Trapster, تشغله ويجيب لك محلات الواي فاي او شبكات الإنترنت اللي قريبه منك على شكل خريطة ,, تروح عندهم وتشبك
  28. pMessenger وأخيرا وليس آخرا, إن كنت تبي تشتري بلاك بيري علشان الشات والإضافات والخرابيط ويصير عندك بي بي pin , لوول هذا برنامج للأيفون إسمه pMessenger ويصير عندك PMiD . اللي يبي يضيفني ترا حقي D4BE0AA7  اللي في النص هذي زيرو
طبعاً هذي بس البرامج اللي انا مركبها حتى الآن, الألعاب ماقلت لكم عنها لان فيه له ألعاب كثير وفيه برامج أكثر , وفيه بعض البرامج تخص الجهاز نفسه ف ماذكرتها هنا لانها كثير بعد.

الجهاز منه وفيه فيه iPod بحيث تقدر تحمل اغانيك او مقاطعك الصوتية وترتبها على حسب الفنان أو الألبوم وتشغل فيه فديوهات

فيه حاجة عجبتني كثير في الأيفون وهي حاجة ممكن استخدمها بال iPod , حاجة إسمها iTunes U , هذي مايحتاج لها برامج ولا شي , أقدر أنزل محاظرات جامعية أو حاجات زي كذا عالأيفون بمختلف المجالات(الهندسة,الفلسفة,الإدارة,التجارة…..إلخ) واحطها عالأيفون , إذا كنت فاضي وجالس خمس دقايق ماعندي سالفة(وهذي العادة) أركب سماعاتي واشغل احد هالمحاظرات الخفيفة واقعد اتسمع لها وأحيانا يكون معها عرض فديو.

الجهاز أكثر من رائع وأنصح أي أحد يسرق 3000 ريال ويروح يشتري له واحد

هذي صور للبرامج اللي انا مركبها

اللي عنده إستفسارات أو أسئلة يتفضل وفيه عالم ثانية كثير ممكن ترد عليه

واللي عنده إضافات أو تصحيح على الخرابيط اللي انا حطيتها أو عنده برامج حلوة للأيفون , حياه الله

24 comments

  1. توته · فبراير 8, 2010

    أقول لا تسب البلاك بيري /الاي فون حق الناس المساكين اللي عندهم شعور بالنقص واللي مهم صاحين

    • Mo9a7i · فبراير 8, 2010

      الايفون حق الناس اللي عندهم اكثر من 2800 ريال
      والبلاك بيري حق الناس اللي عندهم من 2000 وتحت , خلي عنك الكلام بس :p
      لو عندك فلوسه والأمور سهلات والله لتشترين ايفون خخخخخخخخخخخ
      على فكرة,
      انا خربتها وشريت بلاك بيري وقاعد أحتقر نفسي حالياً , لي شهرين وانا احتقر نفسي وحتى الترويش مانفع فيني.

  2. همس الغلا · فبراير 8, 2010

    انا حاليا معي الفور جي وداجه هههههه

    ولا اعرف برامجه للحين هع

    يعني يبي لي كم يوم علشان انفضه عدل هع

    وبعدين عليك عنصريه مهي طبيعيه وشايل على البلاك بيري واهله هههههههههههههه

    ع العموم اهنيك على اختيارك لشركة ابل

    تحيتي

    • Mo9a7i · فبراير 8, 2010

      لووووول مبروك الفور جي ولو إنها جاية متأخرة مرة
      لكن الآيفون فعلاً جوال
      والبلاك بيري يبقى نص جوال

  3. alglaa · فبراير 8, 2010

    السلام عليكم
    والله انا حبيت الاي فون من كلامك بغيت اسال البرامج اللي قلت عنها لازم انزلها بنفسي احسها صعبه والا هي موجوده بالاصل
    وهل تنصحني انتظر ال 4g
    ولك جزيل الشكر

    • Mo9a7i · فبراير 8, 2010

      هلا والله بغلا
      المهم لووول

      بالنسبة لتركيب البرامج بالآيفون سهل جداً
      فيه دايمأً أحد البرامج اللي على الآيفون , حاجة إسمها
      App Store
      وهو أحد البرامج
      هذا تدخله وتنقي وتبحث عن البرامج اللي تبيها وبضغطة زر غالبيتها تركب على جهازك

      طبعاً بعض هالبرامج ذكرت إنها تحتاج جيل بريك أو فك حماية الجهاز
      طبعاً فك حماية الجهاز أيضاً شغلة ضغطة زر واحد وبعدها يركب لك برنامج ثاني زي الـ
      App Store
      إسمه
      Cydia

      طبعاً هذا السيديا تقدر تسميه السوق السودا حقت البرامج , أو زي عمارة الدوسري بالخبـر , البرامج اللي بفلوس يجيبونها ببلاش
      والبرامج الممنوعة في أبل , يحطونها هناك

      طبعاً أبل عندهم بعض القرارات الغبية يمنعون بعض الشغلات اللي ماله داعي يمنعونها
      مثل مدينة الملك عبدالعزيز وحجب المواقع , الظاهر الموظف لازم قبل لا يرجع البيت يحجب له ألف موقع حتى لو مافيها شي

      ف , حطوا السيديا يحطون فيه هالبرامج لا أبل ولا غيره يوقفون بطريقك

      بالنسبة للفور جي والثري جي إس
      الموضوع هذا يعتمد على كمية حماسك للموضوع
      :p

      لان ماتوقع الفرق واجد بين نسخة والنسخة اللي بعدها على طول

      يمكن لو طلع شي بعد الفور جي ,, ساعتها راح أغير جوالي أنا, أو يمكن أنتظر للي بعد اللي بعد الفور جي , لان يمكن مافيه خواص واجد او فرق يستاهل إني أبدل

      ف عادي , بعالم الجوالات , صك الموجود , إنبسط وعيش جوك , لانه بكرة أو بعده بيطلع نسخة جديدة وعادي ماتفرق , متى ماصرت رايق مرة ثانية وطفشت من اللي عندك صك الموجود , لا تنتظر شي

      شكل الفور جي مطول عالسعودية

  4. Retaj · فبراير 8, 2010

    ماشالله برامج حلوه وشهيه والله
    عندي سؤال إذا تعرف .. غالبية هالبرامج تجي حتى في الآيبود تتش؟
    يعني مثلاً pMessenger أو Facebook أو aNote < وهذولي الاهم احتمال تضبط؟

    • Mo9a7i · فبراير 8, 2010

      يس كلهم يشتغلون عالايبود تتش

  5. MaZaJi · فبراير 8, 2010

    الله مير يحيك .. أدري إني مرحب فيني .. مايحتاج ذا الكلام خخخخ ..

    ناوي أقلقك والله *_* ..

    ودي أسألك كذا سؤال .. بحكم إنك تقدس شركة آبل

    وأقدر أقول عنك إنك إنسان آبلي ..

    بعد البحث وتسحيب الارجل من بين موقع لموقع في شوارع الشبكات العنكبوتيه ..

    طبعاً أنت عارف الضجة اللي صايره بهذا الوقت عن الاي فون فور جي

    وفي رواية أخري فور جي أتش دي ! ..

    والاشاعات .. خصوصاً الاشاعه الاخيره من موقع جيزمودو بإن الفور جي بحوزتهم ..

    وعرضوه في اليوتيوب .. وكتبو بعدها مقالات عن كيفية القصه..

    وكانت بطرق ساخره ! ..

    تخلي من الواحد ضايع .. الغريب إن الشركة ماذكر منها أي شيء

    خصوصاً في موقعها الرسمي ..

    الشيء الوحيد اللي ذكرته الشركة .. نظام الجيل الرابع ( أو إس 4.0 )

    وإنه راح يتوفر على الاي فون ثري جي اس وثري جي والاي باد قريباً في جون !؟

    إن شفت وضاعت الطاسه .. قلت أستنى لنص شهر ماي

    وأشوف هل فيه جيل جديد من الاي فون .. ولا أطق لي واحد ثري جي أس ..

    ولا كيف ..

    إذا كان عندك معلومات .. أو خلفيه .. ياليت تنورنا ..

    المايك لك يامهند !..

    • Mo9a7i · فبراير 8, 2010

      اتوقع لو تنتظر للفور جي اطلق

  6. MaZaJi · فبراير 8, 2010

    توني أدري إن فيه أخطاء الاملائيه ..

    والله من العجله ..

    جوالي أسمه ساتيو مو ساتر .. واااهههههههههه

    عموما .. حبيت أبشرك إن راح أصير من ضمن عائلتكم الكريمه يامهند ..

    ونتشرف بذلك هاااع

    • Mo9a7i · فبراير 8, 2010

      You are more than welcome Azooz

  7. MaZaJi · فبراير 8, 2010

    بسم الله الرحمن الرحيم

    الصلاة والسلام على أشرف الانبياء والمرسلين ..

    نبينا محمد عليه ألف الصلاة والتسليم ..

    أما بعد ! ..

    ….

    الحمد لله إن لست من يمتلك البلاك بيري عليه اللعنة ! ..

    ولا تسان صرت من أعداد المستحقرين في لستتك المخنبقة ..

    حقيقة .. البلاك بيري جوال حق ناس فاضيه .. حقت قرق طول الوقت ..

    لا تستهويهم البرامج او غيرها من أوبشنز تكون متوفره في بعض الجوالات ..

    بتميز كل شركة بميزه ..

    أنا من الناس اللي كنت أنظر للأيفون منظور غريب .. معقد .. حساس .. عقيم !..

    وكانت نظرتي لهذا الجهاز خاطئة .. من التندم الشديد لما قلته من قولاً !..

    وندماً في إستعجالي لشراء جوال ليس بأيفون ..

    أشتريت جوال من شركة سوني إريكسون .. ساتر فئة أس 60 ..

    الجوال جميل ويدعم الفيس بوم واليوتيوب والماي سبيس ولونيلي بلانيت ..

    وغيرها من متصفحات تكون بشكل مختلف تتميز فيه جوالات السمبيان ..

    وشدني بالجهاز .. كاميرته .. 12.1 ميجا بكسل ..

    لكن اللي يغضني إن السوفت وير مشابه جداً للصوفت وير نوكيا فئة اس 60 من نظام السمبيان ..

    تجيني حالات تردد فيه بيعه .. مع إن لو زدت 500 ريال على سعره أبو 2499 ريال

    كان طقيت الايفون ..

    وأنا شاري الجهاز من قبل عيد الاضحى .. وأبو الشباب ماسك سعره إلى هذا الوقت ..

    وشكلي راح أحلل الجهاز سنه إل سنتين .. وأنتظر أيفون فور جي أس ..

    بعد ماينزل فور جي ..

    يعني مروقين ..

    اهني كل شخص شاري أيفون .. عقبال ماأشرق لي واحد بفلوسي طبعاً هع

    • Mo9a7i · فبراير 8, 2010

      هلا والله مزاجي

      والله تعجبني
      مو لازم تشتري ايفون بس اهم شي لا تشتري بلاك بيري

      بس ياااخي
      العالم كلها طايحة فيه يااااخي

      << بدا يخورها كنه بيشتري له واحد

      هههههههههههه لا والله يبطون , عندي ايفون وارد راسي لبلاك بيري, هزولات

  8. مُج ـرد حُلم ~ · فبراير 8, 2010

    أهلين أخوي موب صاحي وشلوونك ..؟

    اخوي دخلت براسي الأي فوون عقب موضووعك ..

    أنا كنت ناوي على الهيرو hd2 .. فاوش راايك فيه ؟؟

    وأي أطلق هو وألا أي فوون ؟

    وبما أني داااج فأنا مفكر برضوا في الأي فوون 3g هل هو نفس جهازك وألا جهازك المطور ألي فيه s ??

    وما الفرق بين 3g و 3gs ???

    • Mo9a7i · فبراير 8, 2010

      اهلييين اخوي مجرد
      اكيد الثري جي اس بلا منازع
      بالنسبه للفرق
      شف الخصائص اللي حطيتها بالتدوينة هذي الجديد بالإس

      الفرق انه اسرع ومساحه اكبر والبلوتوث فيه مطور بعد

      خلك عالثري جي اس وانسى اي شي ثاني
      واذا نويت بعدين تطلع جهاز ثاني طلع اللي تطلع بس الايفون بيكون عندك الاساسي مايبي لها كلام لانه جوال فيه كل شي وكل اللي عليك انك تفهي بخيالك بس شوي وتبحث عن اللي فهيت فيه وبتحصله بالايفون

      بس اهم شي لا تاخذ بي بي تطيح من عيني

  9. soso · فبراير 8, 2010

    ايوا بتوصلني رساله عالايميل ..

    .. وتسلم انا دحين لسا بحاول بس مصيري اعرف 🙂 🙂

    • Mo9a7i · فبراير 8, 2010

      بالتوفيق وبلغيني إذا وقف عندك شي

  10. soso · فبراير 8, 2010

    .. اوكي .. مررره شكرا

    والله يعطيك العافيه ..

    • Mo9a7i · فبراير 8, 2010

      العفو أختي سوسو
      وإذا ماكلف عليك
      الحين لما ارد عليك انا بالمدونة
      تجيك رسالة عالبريد حقك إني رديت ولا مايجيك تنبيه ؟
      ودي اعرف هالشي لاني ماجربته

      وعلميني وش صار معك جديد , إذا حابة ابحث لك عن مواضيع بالتحديد تساعدك بكل هالمواضيع ممكن اجيبهم لك مع شرح بسيط عن كل درس

  11. soso · فبراير 8, 2010

    .. بس لمن اروح لل i pod يقولي no music هل في برنامج لازم انزله عشان تظهر

    ولا احسن اودي المحل ينزلي الاغاني واخلص لاني من جد تعبت وانا احاول ..

    • Mo9a7i · فبراير 8, 2010

      انا افضل انك تسوين شغلك بنفسك علشان ماحد يلطش معلوماتك
      ابدي بتنزيل برنامج
      iTunes
      من شركة apple.com
      واشبكي الواير بجهازك والكمبيوتر وسوي سينك
      لو تبحثين بقوقل بالشكل هذا بتحصلين نتايج
      ” ربط iphone مع itunes ”
      او
      ” نقل اغاني للايفون ”
      بتحصلين مواضيع كثير وشروحات بالنت بتفيدك

  12. soso · فبراير 8, 2010

    طيب ممكن اعرف كيف بعد ما انزل الاغاني فين الاقيها في الاي فون ..

    لاني حاولت كتير وما عرفت ..
    ..ياريت تساعدني وشكرا …

    • Mo9a7i · فبراير 8, 2010

      أهلين أختي سوسو

      إذا إنتي رتبتي أغانيك بالـ آي تونز وسويتي sync مع الايفون
      بتحصلين أغانيك داخل ايقونة
      iPod

      ادخلي هناك وحوسي شوي لين تتعرفين عالوضع , هو يبغالك تحوسين فيه مرة وحدة وبتفهمين فيه كل شي

      خبريني إذا باقي معاك مشاكل