وش ذالسمعة السيئة؟

فجأة كذا وبدون سابق إنذار, قاعد أبحث عن Mo9a7i.com في النت
ابي اشوف احد يحبني ماحد يحبني وش السالفة!
إلا فجأة كذا والاقي هالموضوع : http://www.traidnt.net/vb/showthread.php?t=668294

هههههههههههه
عام 2007, يا اللــــــــــــــــــــه وش كنت متعشي البارح ؟؟؟ إيه متعشي بيتزا على حساب خويي أشوى إني مانسيت!

اللي مايعرف الصقر يشويه عموماً,
الظاهر إذا ماني غلطان, ذيك الفترة كان موقعي مخترق, وواحد حاط صفحة مزورة للهوتميل على موقعي ولاطش له إيميل إيميلين.

وجايك واحد غشيم شاف عنوان الموقع موصاحي ف خلاص موصاحي هو اللي لاطش إيميلي.
أنا ما أنكر خبرتي بالإختراق, عندي خبرة بهالأمور , إختراق أجهزة مواقع إيميلات وهالخرابيط (هالكلام طبعاً قديم شوي ماني متابع للجديد) وأغلبها كنت اسويها من باب التجربة وأذكر لطشت إيميلين أو ثلاثة لأصحاب لي إستهبال يعني ورجعتها لهم.
وكم موقع إخترقته , ماعلقت إندكس عليه زي مايسوون الهكرز هاليومين (إندكس يعني كاتب عبارات تم الإختراق ومن هالكلام)
كل اللي كنت أسويه لما ادخل الموقع أقرا الخرابيط اللي فيه وافتش شوي فقط أرضي غروري على مايقولون, إني قدرت أوصل هنا واطلع.

على الرغم من هذي الأمور مستـحيل أكون أنا اللي لاطش إيميل الأخ اللطيف هذا.
بالعادة الهكر, مايكون له موقع, وإذا له موقع مايحط عليه فضايحه ويسوي دعاية لنفسه إنه هكر.

أغلب مواقع الهكرز تكون تعلم عالإختراق أو حاجات ثانية, مو أداة تستخدم للإختراق.

ف السمعة الحلوة اللي حطوها لي لو يبحث أحد عن موقعي, صراحة شي كويس ههههههههههههه هذا اللي ابيه انا,,, 🙁

عالعموم, اللي حاب يشوف تاريخ موقعي أو تاريخ اي موقع ثاني, صور منه وكذا, يجرب هالموقع
http://web.archive.org/web/*/mo9a7i.com

في النهاية, أتمنى إن كان هذولا اللي بالموضوع تضرروا عن طريق موقعي وقروا هالرسالة يسامحوني, إن كان فعلاً أنا وناسي ف أنا آسف.
وأيضاً أنا آسف إن كان شخص إستخدم إسم موقعي بأي شكل من الأشكال وضركم.

وبعد الإعتذار يسمح لي أقول, ياخي من الدلخ اللي بيسوي تسجيل دخول لإيميله الهوتميل من موقع دومينه موصاحي ؟

جات فترة من الفترات كانت قافلة معاي من موقعي وحطيت هذا التصميم بالواجهـة : http://web.archive.org/web/20070926210131/http://www.mo9a7i.com/

فيه بعض الملاحيس بالمنتدى اللي قبل شوي انا حاط رابطه, يحسب إن موقعي مخترق بهالفترة وقاعد يقول هو مايعرف بالإختراق ويبي يخترق الناس.

لو بغيت أخترقك ذيك الحزة طلعت لك من بزبوز موية مطبخكم يارجال مو بس إيميلك, هذي صفحة أنا حاطها بنفسي ولو تقرا بالكامل بتعرف.

ومع هذا, ما أنكر إنه حالياً ممكن أي طفل من أطفال الهكرز يطلع بحركة جديدة ويخترق جهازي أو موقعي, الثغرات موجودة وتطلع بإستمرار وهذا خطر لابد منه لأي مستخدم إنترنت, ف كـبر عقلك شوية واتوقع إنه كبر مابين 2007 إلى الآن ف أعتذر إني حشيتك حش قبل شوي وانت عاقل الحين, ((يلعن ابو اللحسة)).

وبس!

كيف تعرف من هم أصحابك

كيف تقيم أصحابك ؟

Friends

كيف تعرف إذا صديقك كفو ولا خرطي ؟

كيف تعرف إذا هو كريم, شهم, قد الكلام, يفي بوعوده وغيرها من الصفات اللي نعرفها عن البشر!

حقيقة انا اضطريت اتعلم هالشي من بعد تجربة خائسة<<كيف خائسة بس 😀 ؟

عندنا أصحاب كثيرين, بعضهم يصعب علينا تقييمهم من باب الميانة اللي بيننا.
أقصد بهالشي, تربينا مع بعضهم من الصغر, ف مانشوف إلا الشغلات اللي يسوونها قدامنا أو تعاملهم معنا.
وصعب إننا نحكم على أصدقائنا او نقيمهم من خلال تعاملهم معنا, بتقولون لي ليش, وانا راح اقول لكم ليش لان هذا سبب المقالة بقوله سواء سألتوا ولا ماسألتوا ولا بيطلع ماعندي سالفة.

طبعاً صعب إنك تقيم أدب وأخلاق زميلك في تعامله معاك, الظروف تختلف من صداقة لصداقة لكن صديقك اللي يمون عليك ولو كنت إنت إنسان مثلي, السب والسلتحة في بعض هذا شي عادي ومفروغ منه, يشرشح سلسفيل أهلك وهو يضحك وانت تفطس ضحك ولا بالخاطر شي.
ومن الأمور الأخرى, هل الرجال يفزع ولا مايفزع, وقفتوا عند بقالة وطلبتوا ثنين فلافل وثلاثة عطر شانيل وطلع الحساب 10 ريال وحلف عليك إلا إنه يحاسب وانت أصلا ماعندك إلا اربعة ريال يعني حتى ماتكمل خمسة.
هذا شي عادي جداً ولا يدل إنه كريم فزيع أو أي شي, لانه غصب عليه ابن اللذينا يحاسب عنك تكفيراً للسب والشرشحة اللي صارت فوق, أو لانك انت بتردها له بطريقة او بأخرى وهذي قيمة الصداقة اصلاً.

طيب, يمكن ماتتضح الصورة الحين لكن لو تخشون معاي بالصاروخ هذا وتفهمون قصدي بالتحشيشة التالية تتضح الصورة وتصبح العصافير تغرد فوق روسكم مباشرة, حتى لو حششتوا مضبوط, يمكن العصافير تنظف روسكم وتاكل القمل اللي فيه.

كيف ممكن تقيم صديقك طيب؟

من خلال معاملته للآخرين

كيف يتكلم مع الناس الآخرين اللي خارج حدود صداقاته, الغرباء اللي مايعرفهم.
لو صادف ولقيتوا واحد بالشارع ماتعرفونه ولا يعرفكم وصار بينكم موقف, كيف خويك يتعامل بهالموقف؟ سواء كان الشخص الثاني هذا , أنثى, رجال, ولد صغير, شايب بيقطع الشارع ومتوهق عند الإشارة <<–((مشهد كلاسيكي من الأثر)).

شايب بيقطع السكة

هل يعطف على الصغير ويعامله كنه ولده ولايضحك عليه وإذا راح هل يحش فيه ويصلخه وياكل لحمه؟
هل إذا شاف شخص كبير يحتاج مساعدة, ينقز من بينكم ويروح يساعده ولا يقول مالي دخل؟
هل إذا سألكم غريب عند الإشارة عن توصيف مكان معين يرد عليه بإحترام ويجاوبه بضمير أو إنه يزحلق والدي والديه ويسفره للنعيرية؟
او يمكن يجاوبه صح بس إذا سكر الدريشة قال يالبيييييييييه شفت القطع اللي معاه ؟ أو يقول لك وش ذالسبهة يالله فهم التوصيف!
هل تعامله مع البقالات والمحلات تعامل حلو وسمعته ممتازة ؟ ولا كل بقالات الديرة يطلبونه فلوس ولا يحبون يخدمونه لانه يسبهم ويلعنهم كل ماجا عندهم.

كيف تعامله مع العمال, الهنود, الفلبينيين, الأمريكان والأجانب بشكل عام.
هل هو فاهم إنهم ناس مثلهم مثله متغربين عن أهلهم من أجل حاجة, وإنها كلها مجرد سنة سنتين أو عدة سنين ويصير هو بنفس موقفهم, يفحط بين الشركات بشهادته ولا يطلع له وظيفة؟
ويصيرون هم أحسن منه, لقوا وظيفة بآخر الدنيا وسعوا لها وهو قاعد عند امه؟

تجربة شخصية عشتها معاه

سلف

كلنا نحتاج, أحيانا تحتاج ريال ريالين تاخذها من صديقك وتسميها سلف, موضوع بسيط ماله داعي الواحد يقول رجع الريالين, مع إن من باب الوقاحة والصداقة أحياناً تقدر تزلع لصديقك وتقول له انا كنت أطلبك ريالين, حاسب عني هالمرة.

لكن لما يكون محتاج بيوم من الأيام, وانت في تيك (تيك=مزيج بين تلك وذيك) اللحظة ربي منعم عليك ومنت في ضيق, المبلغ كبير شوي بالنسبة لك وله, ماهو مبلغ تقدر تطلعه خلال شهر مثلاً, وتساعده بكل رحابة صدر.

لما يجي الموعد, طبيعي إنك ماراح تفكر إنه لازم أجيب فلوسي من فلان, خويك أكيد ويمكن ناسي او عنده ظروف.

مع العلم بأنه مفروض ماينسى, ومفروض هو يكون أحرص منك عالتسديد علشان يريح نفسه ويشيل هم من على صدره ف مفروض لو ماكان عنده, يبلغك قبلها بيوم “والله يا فلان ترا موعدنا بكرة لكن لو تسمح لي شوي” وأكيد إنت يالطيب الحبيب بتوافق, الموضوع كله من اوله لاخره اخلاق الله يلعن ابوها اخلاق هههههههههههه ((واضح إني زعلان؟)).

هذي بعض المواقف وتقدر تقيم زي ماقلنا بالأمور الصغيرة الريال والريالين, إذا كان حريص عليها ويردها ويتذكرها بنفسه, تدري إنه إنسان ممكن تعطيه تقييم حلو في الأمور الكبيرة.

موعد

“والله راحت علي نومة يارجال لا تصير زلع عاد” جمل نسمعها دايم من أصحابنا لو تأخروا يوم ونص على موعد معين, فما بالك ب 10 دقايق أو 5 دقايق, لحظات أنت تحتاجه فيها يكون موجود عالوقت, ويسحب على دين اهل أهلك.

نتهاون بالعادة بهالأمور مع أصدقائنا, لكن يبي لك تقيمه من خلال الامور والمواعيد العادية علشان تعرف وقت الجد هل اقدر اعتمد عليه ولالا.

في النهاية

اللي ذكرته ماتوقع إنه الطريقة الوحيدة اللي ممكن تقيم فيها أصحابك, ولكن اتوقع إنها طريقة ممتازة تقدر تاخذ فيها علامات عن صديقك بين فترة والثانية.

ماتوقع إني أخبر إنسان بهالمواضيع, لكن هذي سالفة خونطرية كذا طرت على بالي وقلت أشخبط عنها شوي, طبعاً هي من كانت تحشيشة مستمرة تسير علي كل فترة والثانية وهالمرة قررت أكتب عنها.

أنتم وش رايكم بموضوع تقييم الأصدقاء؟

الخدمات الإلكترونية | وزارة الداخلية , أخيراً وبعد طول إنتظار

كثير منكم سمع عن e-Government  عندنا بالسعودية وووووو كلام من يمين ويسار ومن هالسوالف

الحمدلله, أول بوادر هذا النظام بدت تطلع عالنت, بوابة إلكترونية لمعلومات الشخص بوزارة الداخلية

وزارة الداخلية

http://eservices.moi.gov.sa

تقدر تسجل دخول بالبطاقة أو اليوزر والباسورد أو رقم بطاقة أحوالك, , أتوقع هالشي راح يكون للبداية فقط وبالمستقبل لازم الواحد يدخل بيوزر وباسورد.

السبب إنه حالياً العالم ماعندها يوزرات ولا باسوردات ولا لهم معلومات مسجلة بالسستم, ف يحتاجون يخلونها سمردحة شوي ولو إنه ممكن يصير مشاكل, لكن المشاكل هذي سهل حلها.
الموقع راح يعرض لك شغلات بسيطة حالياً ووظائف قليلة

  • راح يعرض لك إذا إنت قد بصمت ولا ماقد بصمت
  • تقدر تحج هالسنة ولا ماتقدر تحج
  • كم عندك عامل
  • وبعض المعلومات عن العمال
  • وكم مخالفاتك بالمرور وكم قيمتها
  • وتاريخ اخر مخالفة ومن هالسوالف
  • طبعاً من خلال الموقع أيضاً تقدر تحدث بياناتك اللي يحتاجونها الإدارة العامة للمرور
  • تقدر تحجز مواعيد ببعض الدوائر الحكومية
  • وفيه بعض النماذج اللي ممكن تحتاجها لإنجاز بعض المعاملات بالدوائر الحكومية.
لكن حلو جداً إن المعلومات هذي كلها صار تقدر تطلعها من مكان واحد, وهالشي يعني إنه صار فيه centralization عندنا بالبلد للمعلومات وهالشي راح يغير من الأحسن للأحسن وبسرعة.

انقطاع البلاك بيري – ههههههههههههههههههههههههههههه

أصدرت هيئة الاتصالات وتقنية المعلومات السعودية بياناً أكدت فيه إيقاف خدمة بلاك بيري بدءاً من الجمعة، 6-8-2010.

وأكد البيان أنه “نظراً إلى أن المهله المحدده أوشكت على الانتهاء ولم يتم استيفاء الشروط التنظيمية المطلوبه،

فقد تم تبليغ مقدمي الخدمه باعتماد إيقاف الخدمة ابتداء من تاريخ 25-8-1431هـ إلى حين استيفاء المتطلبات التنظيمية لهيئة الاتصالات وتقنية المعلومات.

www.alarabiya.net/articles/2010/08/03/115647.html

العربية الثلاثاء 22 شعبان 1431هـ – 03 أغسطس 2010م


يعني إحتمال يرجع بس ماحد يدري متى

انقطاع خدمه بلاك بيري وكركاتيرات

750 الف مشترك بالسعودية اصابعهم بترجع لحالتها الطبيعية إن شاء الله وبيصيرون يشتغلون احسن من أول

انقطاع خدمه بلاك بيري وكركاتيرات

مدمنين البلاك بيري راح يضطرون يدورون بياعين مثلهم مثل حقين الشسمه والشسمه

انقطاع خدمه بلاك بيري وكركاتيرات

جدتنا بتصير تقعد معنا ,, هييييييه , هييييييه

انقطاع خدمه بلاك بيري وكركاتيرات

بيصيرون يبيعون البلاك بيري بالبقالات لووووووووووووول, تشتري نيدو ويعطونك ثنين بلاك بيري ببلاش

انصح اللي ماباعوا جوالاتهم للحين يبيعونها قبل لا يصير سعرها 4 ريال مثل الصورة

انقطاع خدمه بلاك بيري وكركاتيرات

لاتعليق ههههههههههههههههههههههههههههههههه

والله كانت أيام حلوة وهادية حقيقة هههههههههههههههههههههه

بنفقدكم ياحقين البلاك بيري

كيف تخلي الماوس يضغط 1000 ضغطة بالثانية اوتوماتيك

كان فيه لعبة بالفيس بوك لاعبينها الشباب, فكرتها هي:
فيه زر بنص الشاشة
والسؤال هو , كم مرة تقدر تضغط على هذا الزر خلال 10 ثواني
طبعاً جربتها وطلع معدل الضغطات بالثانية عندي هو 7 مدري 8

فكرت وفكرت كيف أطور من مهاراتي وازيد عدد الضغطات بالثانية
وشطحت براسي فكرة زي إبليس صغير كذا قالت لي:

” وش اللي تطور مهاراتك انت ووجهك ؟ بلا مهارات بلا بطيخ, سو لك برنامج صغير يضغط بدالك وخل عنك التضغط , قال اطور مهاراتي قال “

عاد عجبتني فكرة إبليس وسويت برنامج بالسي شارب, لوول,

هذا رابط للعبة مباشرة في الفيسبوك :apps.facebook.com/swdrfpaoqdordealf/?ref_6w=f_clicks&ref=mf

وهذا الفديو حق البرنامج اللي سويته: httpv://www.youtube.com/watch?v=wJmY6zfs5Xw

وهذا رابط البرنامج إذا أحد يبي ينزله: www.mo9a7i.com/MouseMove.exe