كثير أوقات تمر, نجري فيها حوارات مع أنفسنا زي كذا.
أفكار بايخة , أفكار خايسة وملعونة جدف.
وأحيانا مش أفكار , أحيانا نسوي بعض هالشغلات (ما أقصد القتل)ـ بس اقصد الشغلات المحرمة والممنوعة مثل الكذب والخيانة والنفاق والغيبة, نسويها ولا نقول لأحد عنها, نخليها أسرار بيننا وبين أنفسنا وتستمر الحياة ويازيننا ويامحلانا , الظاهر مننا هوالشغلات الحلوة  الأسرار مفروض تبقى أسرار على طول.

بعترف لكم عن عيب فيني إني أحيانا أفكر بالإنقليزي بيني وبين نفسي, ياليت الإنقليزي مضبوط مية المية , إلا إنقليزي منتف بس مادري, حاجة ماقدرت افتك منها, المهم , بخصوص الكلمتين اللي توني قلتها بالسطر اللي فوق, طرى على بالي مقولة , مادري أحد قالها ولا أنا متفلسف وكاتبها بالإنقليزي, تقول:

We only see two things of people:
1- What we want to see.
2- What they want to show us.
Never the true naked clear picture

نحن نرى شيئين فقط من الناس:
1-الأشياء التي نريد أن نراها.
2-الأشياء التي يريدوننا أن نراها.
لانرى الصورة الحقيقية الصافية أبداً.

المهم, على طاري إننا نخلي بعض الأشياء اللي نسويها ومحنا فخورين فيها  أسرار والمفروض تبقى أسرار

هنا يجي موضوعي اللي ابي اتكلم عنه ” بعض الأسرار يجب أن تبقى أسرار” وأتمنى إن كلامي يكون له تأثير على الرغم من إنه خرابيط موصاحي.

السؤال, ليش ياخي إسمها أسرار ؟ يعني حتى نفسنا الشريرة اللي تحثنا على هالشغلات والخراابيط , تقول لنا إن هالشي لازم يبقى سر, لا تعلم أحد عنه, ياخي تراك بتنفضح وبتصير لك مصايب والناس بيقولون ويسوون فيك, إسمها سر, حتى الشيطان أحيانا يستحي من بعض الأسرار اللي يسويها.

لأغراض موضوعي هنا, راح أقسم الأسرار لقسمين:
1- الأسرار اللي إحنا “البشر الأغبياء” نعتقد بأنه لازم نتكلم عنها, يوووه هذا سر بسيط بس بيذبحني لو ماقول لاحد عادي خلني اعلم الناس اللي حولي وارتاح, والأسرار اللي أحيانا نزلق في الكلام ونقولها بدون قصد ونجيب أم العيد

الغباء اللي يخلينا نقول هذي الأسرار للناس علشان نرتاح منها, إذا إحنا أنفسنا ماقدرنا نمسك سرنا ونسكت وننطم, كيف نثق بشخص آخر حتى لو كان أعز صديق لنا, يعتبر بمنظورنا دايم إننا إحنا احسن منه, ف كيف تقول لشخص أقل منك سرك وتبيه يحفظه لك؟
كيف تقول له سرك وتقول أمانة لا تعلم أحد؟ مستحيل, إلا إذا كان أطرم وأصمخ ومايشوف إشارات يدك ولا يعرف لغة الإشارة, لحظتها ممكن مايقدر يعلم أحد عن اسرارك.

2- النوع الثاني, هو الأسرار اللي إحنا “اللي بعيون أخويانا إحنا أنقص منهم” ودنا إننا نعرفها عن أخويانا أو أقاربنا أو حتى الناس اللي مانعرفهم

هذا هو النوع اللي يعقد من جد ويخلي الواحد يحتقر نفسه أحياناً وينفك مخه وهو يفكر ويحاول يحل المشكلة اللي إكتشفها عن طريق كشف هالأسرار.

الناس يقضون كثييييير أوقات وهم يحاولون ينبشون عن أسرار الناس اللي حولهم,,وأحيانا يتبعون طرق غريبة علشان يكتشفون هالأسرار, أولها الغباء,, تكفى أمانة علمني , قل لي قل لي وش صار, والله ماعلم احد, أو بالحيلة, يمثلون إنهم يعرفون السر لين تجيب العيد وتعلمهم التفاصيل , أو يسرقون هالسر,,يناقزون من عند جدار البيت ويطالعون بالدرايش, يستخدمون تلسكوبات أو أخوياهم بشركات الإتصالات أو بالإختراق أو بغيره.

هذي غريزة بالإنسان ,  مايحب الأسرار حتى لو هي أسراره الشخصية , بس ماحد يركز بنفسه , كلن وده يعرف أسرار غيره, وأحيانا برضه ماوده ينبش بأسرار  أهله , أمه أبوه , إخوانه , جيرانه, لسبب غامض ودفين مايفكر فيه الشخص , واللي هو إنه مايبي ينبش ويحصل شي مايسره في أبوه ولا امه ولا الناس القريبين منه مرة ويكرههم على طول ويكره عيشته معهم وتصير حياته صعبة.

طبعاً ماحد يحب يفكر ليش أنا ما أنبش بأسرار أبوي, والسبب زي ماذكرت قبل شوي , لكن قليل اللي يعرفون هالسبب ,بالعادة الناس تتجاهل هالموضوع وخلاص, لا عاد نفكر فيه بس
ويقعد ينبش بأسرار أخوياه أو الناس اللي حولهم

وشرايك لو إكتشفت إن ابوك يكرهك أو يكره أمك أو إنه قد ذبح واحد يوم إنه صغير ولا علم احد وإنحاش للديرة اللي انتم فيها الآن وغير إسمه
وبدا تاريخ جديد, تخيل إن أبوك في لحظة من لحظات حياته وهو قاعد يعاني من هالسر ويحاول يكتمه , لكن غصب عنه إضطر يطلعه من نفسه ويكتبه على جدار في الربع الخالي
ماحد حوله بس عشان يرتاح شوي, يكتب “تراني قتلت فلان, أو أكره عيالي وماطيقهم ولا اطيق امهم” لوووول, المهم وانت طالع رحلة مع اخوياك بعد سنييييييييين للربع الخالي طحتوا على هالجدار اللي مرتز في نص البر وقريت الكلام وعرفت خط أبوك, يمكن حتى مو خط أبوك وأبوك ماكتب هالكلام, شخص ثاني كاتب هالشي عن نفسه بس إنت طرت ببالك فكرة
إنه, يمكن ابوي مسوي مصيبة مثل هذي وساكت؟

تخيل هالشي صدق, وإنت إكتشفته! , حياتك بتبقى زي ماهي؟

لاعاد, لحظة خلوني أعطيكم المصيبة عاد, تخيل لو إنك إكتشفت إن أمك وأبوك ماهم أمك وأبوك, متبنينك أو لاطشينك وأنت عايش معهم من يوم إنك صغير ولاقالوا لك ولا جابوا لك طاري (هذي فكرة دايم تطري:p)

ماراح ينفك مخك؟ مين أمي وابوي الأصليين؟ مين أهلي وجماعتي؟ وش بتكون علاقتي بهالناس اللي هم أمي وابوي اللي الحين لو كنت أنا عايش مع أهلي الأصليين؟ هل باشوفهم واعرفهم؟ مين بيكونون أخوياي؟ هل بوصل للشي اللي انا واصل له الحين؟ يمكن أهلي الثانين جا يوم وإحترق البيت ومتنا كلنا ؟ (وأترككم تتخيلون الموقف عاد)ـ

أسرار وصخة وكثيرة عند كل واحد فيكم صغير ولا كبير أم ولا أبو جد ولا جدة, بعضها ماحد يعرف عنها نهائي, وبعضها يعرفها ناس قليل لكن المفروض وعلشان التوازن الكوني
إنت يافلان مفروض ماتعرفها

هذي اللي ذكرتها فقط بعض الأمثلة, ممكن لبعضكم , ماتعني شي حتى لو صار هالمثال, بعضكم اصلا يدري إن أبوه قاتل واحد أو إن ابوه مايحبهم أو إنه متبنى, ممكن هالأسرار ماتعني لبعضكم شي لكنها مجرد أمثلة

وممكن فيه اسرار بسييييييييييطة جداً يعني مافيها لا قتل ولا سرقة ولا خرابيط , وتعني لبعضكم الكثيييييييييييير

خلونا نشوف مثال ثاني وفيه بنهي موضوعي:
تخيل إنك هكر, مخترق ,تقدر تفتح أي شي وتقرا أي جهاز وتتحكم بأي جهاز من أجهزة الناس اللي حولك سواء تحبهم أو تكرههم,حلوين؟
قاعد تراقب أخوياك والعالم اللي حولك وتراقب كل حركة وكل كلمة يقولونها ويسوونها, ودي كل واحد منكم يسرح بخياله ويتخيل وش ممكن يكشتف من أسرار وصخة؟

وش أسوأ شي ممكن تعرفه عن خويك يخليك تكرهه وودك تلعن شكله أو عالأقل ماتماشيه طول عمرك؟
وش الشي اللي ممكن تقراه بمحادثات أحد أخوياك بس ويخليك تكره كل أخوياك وكل الناس اللي حولك وتنعدم الثقة بينك وبينهم ؟

ودك تعرف صدق ؟

صدقني , لو إنت قاعد تراقب, راح تحصل شي بيوم من الأيام يخليك تكره هالناس اللي تثق فيهم للأبد. ممكن يكون سالفة أو حوار دار بينهم وبين شخص آخر ماتعرفه أو تعرفه, ممكن بأحد الحوارات , خويك قال لواحد ثاني إنك إنسان غبي أو إنه كذب عليك في أحد المواقف اللي تهمك أو يمكن قال لشخص أحد أسرارك اللي ماتبي أحد أبداً يعرف عنها.

خلونا نوقف هنا, في اللحظة اللي عرفت فيها هالشي عن خويك وكرهته.

على الغالب إنها بتزق معاك بهاللحظة وبتلعن الساعة اللي عرفت فيها خويك أو بتكبر المصيبة براسك وتحس بحرج جديد لان كل اخوياك يعرفون سر إنت ماقلته إلا لشخص واحد تثق فيه بينهم, كيف بتقابلهم, كيف بتمشي مع ناس مايحترمونك وقاعدين يضحكون بوجهك ومن وراك هم شي ثاني؟ من بقى لك بهالدنيا؟

ممكن الآن نرجع للحظة اللي عرفت فيها هالسر وبديت تكره خويك لحظتها؟ اوكي ,, انت توك مكتشف هالشي

تخيل لو إن خويك بلحظتها أو بعدها بيوم, حس بندم مرة وفكر بينه وبين نفسه, لا حرام اسوي في فلان كذا, غلط اللي انا سويته , والله ماعاد اسويها مرة ثانية , فلان خوته بالدنيا كلها وأنا حمار لاني سويت كذا, يلعن ابوك يابليس اللي خليتني اسوي كذا بخويي(مع إن بليس ماله شغل بالسالفة:P), يمكن خويك يكتشف إن هالشخص اللي تكلم عنك قدامه شخص مايستاهل وكل سواليفه حش بحش باخوياه وجوه وصخ ومايستاهل إن أحد يخاويه, وسحب عليه ويبي يستمر معك لانه يعرفك إنسان كويس.

خويك حس بغلطته ويمكن كانت الغلطة الوحيدة بحياته وحالف بينه وبين نفسه إنه ماعاد يكررها مرة ثانية. خويك فعلاً ذيب ومايسويها , لكن غلط ذاك الليل وسواها ولايبيك تدري عن هالشي اللي هو متفشل منه وممكن بلحظة من لحظات المستقبل يفاتحك بالموضوع ويعتذر منك.
لكن هيهات هيهات, أو على قولة بابا نويل ,هوهوهووو , إنت خلاص الحين عرفت السر ووقفت وقفلت فيك الدنيا, يا إنك بتكون إنسان ضعيف شوي وماتقدر تواجه موقف زي كذا وبتخلي حياتك تمر طبيعي والكره هذا بتخليه مدفون بخاطرك وبتزق في جو نفسك وانت مع اخوياك دايماً, أو إنك بتسوي شي بتندم عليه بعدين, ممكن تقطع علاقتك بهالناس وتخرب عليهم وتسوي لهم المثل وتنقطع علاقتك معهم.

الاخويا مايتعوضون إنت الخسران بهالحالة, والسبب, إنك حشرت نفسك بأسرار غيرك اللي مفروض إنها تبقى أسرار ومفروض إنك ماتدري عنها.

هذا خوي واحد وخسرته وإنتهى, بتروح تبدا بالثاني والثالث والرابع, بتكتشف شغلة عن كل واحد بتخليك تكرهه وهالشغلة مفروض إنت ماتعرفها أو ماحد بالدنيا يعرفها, خسرت أخوياك كلهم, ماعندك ثقة بالعالم , ماعاد فيه احد ودك تمشي معاه او تتكلم معاه, تعقدت حياتك, حبة حبة صرت حتى هندي البقالة ماتثق فيه يمكن يحط لك شي بالموية, حتى المطاوعة بتبدا تشك إن عندهم أسرار بالشكل الفلاني والفلاني(تصورها بعقلك إنت) صحيح عندهم أسرار لكن مش الأسرار اللي في بالك, خلاص ماعاد فيه احد بالعالم يستاهل.

هنا تجي عند البعض النفس الشريرة مع إبليس مع بعض يد بيد ويقولون لك ياخي إذبح نفسك, وش تبي بهالدنيا الفاسدة, العن ابوها ديرة لوووول,

أكيد منت غبي ومنت منتحر بس هالفكرة ببالك ومرت عليك. معنى الكلام, إكتشافك هالأسرار الصغيرة وصلتك للحضيض ياصديقي وأنت بادنى مستوى بحياتك الآن.

السبب اللي خلاني أكتب هالخرابيط, هو إنه البعض من الناس اللي حولي إعترفوا لي بأسرار ماقدروا يمسكونها والأسرار هي :

إنهم إكتشفوا أسرار عن ناس حولهم وإنصدموا بناس يثقون فيهم وبعضهم لما إكتشف هالسر , حاول يسوي شي بخصوص الموضوع, يعدل هالمشكلة لكن ماقدر, والسبب إنه ماوده يتخلص من هالأصدقاء لانه يحب شغلات كثيرة فيهم ماهي محصلها بناس ثانين, وأحيانا بكل بساطة مايقدر يسوي أي شي عشان يواجه هالمشكلة اللي إكتشفها أو يواجه الشخص اللي سوا هالخطأ.

صدقوني, ناس كثير تعقدوا والسبب إنهم يجرون ورا الأسرار, أنا كنت اقول ومازلت أقول, المعلومات قوة, لكن, راح تسبب لك الضعف إذا ماتقدر تتحكم فيها وتنظمها بعقلك بصناديق مختلفة ومخصصة لكل نوع من هالمعلومات.

أوكي, إنت إنسان ملقوف, إعرف الأسرار, لكن خلي كل شي زي ماكان , لا تنصدم أو تغير حياتك لانك إكتشفت سر, يوم من الأيام راح تجي اللحظة اللي تقول فيها (الحمدلله إني ماسويت شي).

ونصيحة للي مايحب يدخل بهالسوالف, خلك كذا , إكتشاف الأسرار ماهو حلو إطلاقاً,

ولهذا السبب إسمها أسرار, الحياة تمشي طبيعية وزي الحلاوة بدون معرفة هذي الأسرار, بل في الحقيقة, الحياة تستمر بأحلى أشكالها بدون معرفة هالأسرار.
وياخبر بفلوس , بكرة ببلاش.

أشكر كل من وصل لهذا الحرف< وقرا كلامي
وأتمنى إن عجبتكم هالطريقة من الكتابة أشوف تعليقاتكم علشان اتشجع وازيد الخرابيط, أو بحول نشاطي واشتغل طباخ عند حسين وإنتهينا

تحياتي
موصاحي